Zo je wona hakle 16 lět, wotpowěduje snano prěnjemu pohladej. Sy-li pak Alenu Belkotec na čitanju dožiwił, kaž njedawno na knižnej premjerje Paternostra, da sy so dźiwał, kak sebjewědoma, nazhonita a dorosćena wona skutkuje. Bjez dźiwa tuž, zo je šulerka Ralbičanskeje Serbskeje wyšeje šule tam čitanski rjad literarneho dorosta zahajiła. „Wosebite je, zo maš swójsku knihu w ruce – hewak je to kaž kóžde druhe wubědźowanje“, Alena měni.