Na beneficny nyšpor
Róžant. Chór Lipa wuhotuje jutře, 30. decembra, we 18 hodź. w Róžeńčanskej putniskej cyrkwi swój tradicionalny beneficny nyšpor. Na nim zaklinča hodowne spěwy serbskich, čěskich a druhich komponistow. Zběrka při durjach budźe lětsa za cistercienski klóšter w čěskim Oseku. Wšitcy lubowarjo hodownych zynkow su lubje witani. Po koncerće předawaja tam CD „Serbski rekwiem“ Korle Awgusta Kocora, kotraž je wuslědk nahrawanja oktoberskeju koncertow chóra Lipa, solistow a Drježdźanskeho orchestra Sinfonietta pod nawodom Judith Kubicec w Chróšćanskej cyrkwi.
Hodowny koncert w „Meji“
Radwor. Swój lětuši hodowny koncert wuhotuje chór Meja tohorunja jutře, pjatk, 30. decembra, w 19 hodź. w Radworskim hosćencu „Meja“. Jako hosći su sej dźiwadźelnika Měrka Brankačka a „jolka-dźěći“ z Nuknicy přeprosyli. Lětuši program je nimale ryzy hodowny. Zdobom chcedźa Mejenjo z nim tež na swojeho wjelelětneho dirigenta Achima Brankačka spominać, kiž by lětsa 90. narodniny swjećił. Koncertej přizamknu so reje z kapału Con-takt.
Ametyst fijałkojty?