Hodowny koncert chóra Lipa na dobro cistercienskeho klóštra w Oseku

Róžant (JK/SN). Dobra tradicija je hodowny beneficny koncert chóra Lipa w Róžeńčanskej swjatnicy. W połnje wobsadźenej cyrkwi zaklinčachu minjeny pjatk, 30. decembra, hodowne kěrluše a spěwy serbskich, čěskich kaž tež dalšich komponistow. Pod hudźbnym nawodom Jadwigi Kaulfürstoweje přednjesechu Lipjenjo sadźby jednotliwych hudźbnikow na wurjadne zdokonjana wašnje. Jara zajimawe a po zdaću nowa forma, přednjesć twórbu „Ave Maria“ z dźělenym muskim a žónskim dźělom chóra, zawostaji w publikumje runje tak hłuboki zaćišć kaž na kóncu zanjesena hodowna powěsć, kotruž Marko Paška jako ewangelist hłósnje přeswědčiwje sposrědkowa. Lóštnu hodownu atmosferu wuwabi kónčny spěw ze solistkomaj a z přewodom načasneje hudźby. Zhromadnej kěrlušej z publikumom kaž tež dźěl spěwow chóra přewodźeše na pišćelach Hańža Bjeńšowa ze Šunowa. Sylny­ přiklesk publikuma kaž tež derje pjelnjene korbiki zběrki při durjach swědčachu wo tym, zo je so přitomnym hodowny koncert wulce spodobał.