Programy Serbskeho ludoweho ansambla je loni w tu- a wukraju dohromady něhdźe 34 000 přihladowarjow dožiwiło. Kooperacije su so wudanili.

Budyšin (SN/CoR). Prěni wjeršk lěta 2016 bě ptačokwasny program „Kak dźiwnje swět so wobroća“, w kotrymž je Smjerdźečanska rejwanska skupina sobu skutkowała. Dobreho wothłosa dla bě přidatne předstajenje. Nimo Smjerdźečanskich wobdźělichu so tež Wudworscy a Slepjanscy rejwarjo na dźěłarničce z baletom. K 200. narodninam Jana Arnošta Smolerja předstajichu ansamblowcy program „We Łazu w hornjej korčmičce“ a k 100. narodninam Jurja Brězana zarjadowachu orchester a spěwarjo zhromadnje z NSLDź literarno-hudźbny wječor „Jurij Brězan – Ze studnje jeho lět“. Dalša zhromadna produkcija bě jewišćowy bal, a prěni raz přewjedźeštej SLA a NSLDź zhromadnu dźěłarničku „Dźiwadło za tebje“.