Kónc tydźenja kaž tež hišće přichodnu sobotu a njedźelu wotměwa so w Budyskich šulach wokoło Schillerowych zelenišćow a w Kamjentnym domje 26. krajne wubědźowanje „Młodźina hudźi“. 500 młodych hudźbnych talentow z cyłeje Sakskeje staji so na krajnej runinje k posudźowanju swojich wukonow přez něhdźe połsta jurorow.
Budyšin (CRM/SN). Hižo sobotu móžeše so tež zajimowany publikum wo tym přeswědčić, na kak wysokim niwowje so krajne wubědźowanje, kotrež druhi raz w Budyšinje, wotměwa. Mjeztym zo běše we wokrjesnej hudźbnej šuli solowe spěwanje a hraće na klawěrje na rjedźe a předstajichu so w Melanchthonowym gymnaziju smyčkarjo, hrajachu w Schillerowym gymnaziju we wšelakich skupinskich zestawach instrumentalisća na trompeće, róžku, pozawnje a tubje. Tež za publikum běše wulke wjeselo, jim připosłuchać. Rozdźěle mjez wukonami njeběchu přewulke, byrnjež starobny rozdźěl tola rólu hrał. Tu pak dźe wo to, z dobrych a jara dobrych tych najlěpšicho wubrać.