Jurij Koch čita

Hórki. Na zhromadny wječor z rodźenym Hórčanom Jurjom Kochom přeproša wjesne towarstwo Při skale wšitkich zajimcow jutře, pjatk, w 19.30 hodź do rumnosćow wohnjowoborneje gratownje w Hórkach. Spisowaćel čita tam ze swojich dopomnjenkow na dźěćace a młodźinske­ lěta. Młody akordeonist Daniel Grunski čitanje wobrubi.

Z motorskim lěto po Africe

Njeswačidło. Multimedialny přednošk „Na dwěmaj kolesomaj po Africe“ dožiwja zajimcy sobotu, 28. oktobra, w 19 hodź. na žurli Njeswačanskeho hosćenca. Šwicar Martin Münch rozprawja wo swojej spektakularnej jězbje z motorskim po Africe. Wot Kapstadta jědźeše wón podłu wuchodneje kromy kontinenta hač do Kaira a dale přez Bliski wuchod do wuchodneje Europy a do Šwicarskeje. Zastup je darmotny, zarjadowar pak prosy wo pjenježny dar.

Kedźbu, pčołarjo!

Njeswačidło. Zajimawy přednošk wo dźěławosći z tak mjenowanymi dadant-kołćemi poskići Njeswačanska přirodoškitna stacija póndźelu, 30. oktobra, w 19 hodź. na žurli Njeswačanskeho hosćenca. Referent budźe Rolf Schülbe z Bad Schandauwa. Zastup płaći 2,50 eurow.