Sakski minister Thomas Schmidt nowy jednanski koncept předstajił

Lipsk (SN/BŠe). Sakski minister za ratarstwo, wobswět a geologiju Thomas Schmidt (CDU) je minjeny štwórtk jednanski koncept za wšelakorosć insektow w swobodnym staće předstajił. Dźewjeć wobłukow wopřijacy koncept wopisuje nowe naprawy, z kotrymiž ma so mnohotnosć překasancow spěchować. Naćisk ministerstwa za wobswět a ratarstwo budźe nětko we wobšěrnym konsultaciskim procesu k programej dalewuwity. „Škit překasancow je dawno fachowe ćežišćo. Dokelž je jich dale a mjenje, je to alarmowacy signal a wuskutkuje so na cyłkowny ekosystem“, Thomas Schmidt zwurazni.

Wšitcy akterojo towaršnosće su namołwjeni. W městach a we wjesnych kónčinach maja na přikład insektam nješkodźace swěcy instalowane a zahrodki kaž tež łuki z wjele kćějacymi rostlinami wuhotowane być. Zdobom měło mortwe drjewo zdźěla w lěsach wostać, žiwe płoty podłu polow spřihotowane a při­brjohi rěkow zwosadźane być. Z najwšelakorišimi naprawami hodźi so tak překasancam přihódny žiwjenski rum wu­tworić.