Warnujepřed dalšim pačenjom

Donnerstag, 10. Oktober 2019
Artikel bewerten
(0 Stimmen)

Lipsk (dpa/SN). 30 lět po měrliwej rewoluciji je zwjazkowy prezident Frank-Walter Steinmeier zmužitosć ludźi w bywšej NDR wuzběhnył. „9. oktober 1989 bě wulki dźeń w stawiznach Němskeje“, rjekny wón wčera na swjedźenskim zarjadowanju k jubilejej přewróta w Lipsku. Zdobom Steinmeier na to dopominaše, zo je sej jednota Němskeje wot ludźi wjele žadała, předewšěm na wuchodźe kraja. „Wy sće łamki zmištrować dyrbjeli, kajkež moja generacija na zapadźe ženje znała njeje“, zwjazkowy prezident wu­zběhny. Tutón hoberski wukon „njebu dołhi čas w dosahacej měrje hódnoćeny“. Mnozy na wuchodźe su dźěło zhubili a domiznu wopušćili. „Tele wuludnjenje je hač do dźensnišeho hłuboke slědy zawostajiło.“ Wuskutki zjednoćenja Němskeje su přeco hišće widźomne. Mnozy čuja so wopušćeni, rozdźěl mjez wuchodom a zapadom je dale wulki, runje tak kaž tón mjez městami a wjesnymi kónčinami.

Frank-Walter Steinmeier warnowaše před dalšim pačenjom towaršnosće. Třiceći lět po rozsudnej póndźelnej demonstraciji 9. oktobra 1989 wobkedźbuje wón sylny, „ale zdźěla tež njewěsty kraj. Widźu kraj, w kotrymž jewja so rozšćěpjenja. To njewotbłyšćuje so jenož we wólbnych wuslědkach, ale tež we wašnju, kak wo sebi a wo tutym kraju rěčimy. Dajće nas nowy pakt solidarity a mjezsobneho česćowanja wotzamknyć“, Steinmeier namjetowaše. K tomu słuša, sej mjez sobu připosłuchać, so respektować a tež hinaše měnjenja znjesć. „Štóž wo druhich hižo njerodźi, jich wumjezuje a spušći, tón je poprawom tež demokratiju hižo spušćił.“

Veröffentlicht in Politika
Bitte anmelden, um einen Kommentar zu posten

Anzeige