Danielo, we wutornym wudaću Serbskich Nowin móžachmy hižo čitać, zo staj so ty a Marian Žur jako serbskaj triatletaj na kupu Mallorca podałoj. Twój kolega serbskeho tri-teama je mi wo tym hižo tróšku rozprawjał. Prašenje, na ko­trež pak mi wotmołwił njeje: Čehodla runje Mallorca?

D. Matka: Mallorca je wulkotny blečk a mnohim nažel jenož jako domicil za party-turizm znaty. Kak mnohostronska pak krajina tam je, hakle spóznaješ, hdyž so tróšku wotsališ. Wosebje kolesowarjam skići ­Mallorca wulkotne wuměnje­nja. Dróhi su zwjetša asfaltowane a tak za wšědny trening derje preparowane. Nimo toho njeje kupa jenož wot ­morja wobdata, ale tež chětro horata. Muskulaturu móžeš tuž idealnje trenować. A jasna wěc, zo so při miłej klimje wězo lěpje trenuje.

Kak da wupadaše waju wšědny dźeń? Wosrjedź dnja tróšku trenować a wječor party?