SN maja pjeć prašenjow na Jurja Bjeńša, koordinatora koparskeho dorosta Sokoła Ralbicy/Hórki.
Znowa knježi přestawka w amaterskim sporće, tak tež w kopańcy. Kak z tym wobchadźeće a kotre naprawy sće pola Sokoła Ralbicy/Hórki přewjedli?
J. Bjeńš: Kaž wšudźe dyrbjachmy tež Ralbičanski Stadion přećelstwa zamknyć, ale nadźijamy so, zo móžemy jón bórze zaso wotewrěć. Za dźěći a młodostnych je to katastrofa, wšako su jim tydźenski trening a kónctydźenske koparske hry wosebite wjerški. Tež sezona w hali budźe wupadnyć dyrbjeć, štož młodych technikarjow jara zrudźa. Sam tučasnje dorostowy trenar njejsym, zapołožich před lětomaj přestawku. Jako dorostowy koordinator pak doma wšelake běrokratiske wěcy dokoławokoło dorosta Sokoła Ralbicy/Hórki wobdźěłuju.
Kotre kmanosće a kajkosće dyrbi tajki dorostowy trenar měć? Što je w treningu z dźěćimi wažne?