Po dotal jara njespokojacym přeběhu sezony su so zamołwići Łužiskich lodohokejowych liškow rozsudźili, šeftrenarja Chrisa Straubu ze zastojnstwa wuwjazać. Po domjacej poražce 0:4 přećiwo Tölzskim lawam sćahny jednaćel Dirk Rohrbach konsekwency, tež dokelž po zašłych krizach wočakowane wuslědki njewuskočichu.
Z eksistowacym potencialom mustwa a k tomu nowymi impulsami dyrbja sej Liški nětko dočasnje zachowanje klasy jako nowy sezonowy cil stajić a jón na kóždy pad zwoprawdźić. Chris Straube bě mustwo wot Coreyja Neilsona započatk februara 2021 přewzał. W lěću, ke kóncej hrajneje doby 2020/2021, su zrěčenje ze Straubu podlěšili. 47lětny, poł Němc poł Kanadźan, je pak klubej dale k dispoziciji. Wón budźe Łužiske liški ze swojej nazhonitosću w přichodźe mjez druhim we wobłuku scoutinga podpěrać.
