W Baskiskej so zastupjerjo europskich dźenikow mjeńšinowych a regionalnych rěčow schadźowali

Wulězeš-li w španiskim měsće Donostia z busa, napadnu ći hnydom wjacore podobnosće ze „stolicu Serbow“. Tež w Donostiji su nadróžne taflički dwurěčne a tež zda so hewak, jako by Donostia, kotraž rěka španisce San Sebastian, Budyšinej jara bliska była. We měsće mjenujcy bydli tohorunja mjeńšina, kotraž so wote zbytka Španičankow a Španičanow chětro rozeznawa: Baskojo a Baskowki.

Runje w tutym měsće wotmě so lětuša hłowna zhromadźizna europskeho zwjazka dźenikow w mjeńšinowych a regionalnych rěčach, skrótka MIDAS. Organizacija eksistuje hižo z lěta 2001 a ma dźensa 27 sobustawskich dźenikow w 10 krajach. Zaměr zjednoćenstwa wobsteji w tym, mjeńšinowym dźenikam lobby skićić a je w jich prócowanjach sylnić a zwjazować. Tute cile zwoprawdźeja sobustawske nowiny w lětnych zhromadźiznach a w tak mjenowanym „content exchange program“, potajkim w syći, w kotrejž sebi wobdźěleni žurnalisća dźenikow artikle wuměnjeja a tak w druhich krajach wo swojich temach informuja.