Na wikach symjenja měnjeć
Miłoćicy. Towarstwo Kamjenjak wuhotuje jutře, sobotu, a zajutřišim při Miłočanskej skale nazymske wiki rjemjesła a wuměłstwa. Mjez druhim změja wopytowarjo składnosć, přehladku regionalnych a nadregionalnych wuměłskich rjemjeslnikow z najwšelakorišimi unikatami sej wobhladać. Nimo toho wotměja njedźelu wot 14 do 18 hodź. měnjensku bursa za symjenja. Přikuski a napoje su na předań.
Dwójce Dyrlich
Łukow/Drježdźany. Dźěłowe koło Literatur Um Welt prezentuje jutře, sobotu, čitanje z Benediktom Dyrlichom we Łukowje. Na tamnišej žurli lože swobodomurjerjow „Zum Leoparden“ předstaji serbski awtor wurězki ze swojeje dwuzwjazkoweje biografije „Doma we wućekach“. Thebet Azzawi wobrubi zadarmo přistupne čitanje, započinace so w 16 hodź. hudźbnje na oud. Samsny dźeń, ale hižo w 13 hodź., wusyła Drježdźanske Coloradio na frekwencomaj 99,3 resp. 98,4 MHz a na kanalu 7A DAB+ kaž tež online „Hodźinku poezije“, tohorunja z Dyrlichom.
Wužadanja žiwjenja wuměłsce
