Sydnješ-li so z Doris Kasperowej za blido, maš hnydom dobru naladu. Připosłuchaš jej a začuwaš, zo ma wona wutrobu na prawym městnje. Jeje kredo je, ze swojimi začućemi, myslemi a idejemi w bjesadźe z druhimi podobne abo samo samsne ideale a předstawy wo žiwjenju namakać.

Doris Kasperowa njeje we Wojerowskim regionje runjewon njeznata. Wulce woblubowana běše jeje kofejownja w Ćisku, kotruž je wona na statoku swojich předchadnikow zarjadowała a wjacore lěta wjedła. Swoje serbske pozadki a korjenje wona njezataji. Cyle nawopak.