Minjeny tydźeń wotmě so prěni serbski koparski camp, kotrež bě Serbske šulske towarstwo z.t. (SŠT) w kooperaciji z dalšimi akterami organizowało (Serbske Nowiny rozprawjachu). Cyłkownje 32 dźěći w starobje dźewjeć do dwanaće lět (młodźina E a D) wobdźěli so na wosebitym lěhwje. Mjez nimi tež wurjadnej koparce Mona Lukašec a Lea Wjacławkec. Nominowali běchu koparjow a koparce trenar wubranki dorosta starobneje skupiny D Tadej Cyž a zamołwići jednotliwych sportowych towarstwow.

Treningi wotměchu so w Njebjelčicach, Ralbicach a Chrósćicach. Štyrjo serbscy trenarjo a štyrjo kotrenarjo běchu sportowcam wšědnje poboku stali. Na štyrjoch stacijach zwučowachu z nimi we wšelkich hrajnych formach wosebje pohib z bulom, dwuboje, zakitowanje kaž tež třělenje na wrota. Dalša dribblingowa stacija bě za polěpšenje techniki předwidźana. Při tym trenarjo stajnje tež na fairny mjezsobny wobchad na hrajnišću skedźbnichu.