Tradicionalne dohodowne wiki we Wrócławju wabja tež lětsa zaso z wulkim a swojoraznym poskitkom

Prěnje znamjo bližacych so hód w Pólskej su adwentne wiki, kotrež mjenuja tam „Jarmark Bożonarodzeniowy“. We Wrócławju su kóždolětny hermank pjatk, 29. nowembra, wotewrěli, štož bě wyšemu měšćanosće Jacekej Sutrykej wosebity a čestny nadawk. Na wjace hač 200 stejnišćach wikowarjo swoje produkty poskićeja. Často słyšiš nimo pólšćiny tež ukrainšćinu, jendźelšćinu, portugalšćinu a italšćinu, dokelž předawarjo swoje poskitki zwjetša w maćeršćinje poručeja.

Ukrainjanka předawa w swojej budce typiske „čebureki“, podobne pirogam. Njejsu pak warjene, ale w horcym woliju pječene. Runje tak typiski je wišnjowy ­liker, kotryž mjeztym cyłe lěto tež w ukrainskim wobchodźe we Wrócławju z mjenom „pjana wišnja“ dóstawaš.

Polacy kupuja rady tež litawski ćmowy chlěb kaž tohorunja kurjenu šunku a kolbasu. Wopytowar je hladajo na hoberski poskitk runjewon přemóženy.