650 lět Wětrow, wot 1898 ze znatej šamotownju – 1951 nasta nowe sydlišćo za dźěławych zawoda 2. pokročowanje
Šulske dźěći z Wětrowa chodźachu wot spočatka 19. lětstotka do susodnych Bóšic do šule. Tak tež šulerjo z Jaseńcy, Noweje Jaseńcy, Nowych Bóšic, Hory, Łusča a Noweho Łusča. Tomu bě hač do Prěnjeje swětoweje wójny. „Šulska statistika kralestwa Sakskeje“ z lěta 1913 tole wobkruća. Prěnja šula w Bóšicach bě srjedź wsy a w njej jedyn serbski wučer dźěći z dźewjeć wsow wuwučowaše. Sobu ličeny bě tu Nowa Hora pola Nowych Bóšic.
1886 wšitcy wučerjo serbscy
Dr. Arnošt Muka w swojej „Statistice Łužiskich Serbow“ 1886 pisa wo štyrjoch šulach Njeswačanskeje wosady, zo su wšitcy wučerjo serbscy a wuči so po zakonju serbski. W prěnjej rjadowni podawa so nabožina, tež při zjawnych pruwowanjach serbski, w 2. rjadowni wuči so nimale wšo z pomocu serbskeje rěče. Dźěći serbsce čitać nawuknu, serbsce pisać so njewuči. W šulach wužiwa so pjeć serbskich knihow, jenož na Bóšičanskej šuli so Bartkowa čitanka njenałožuje, město Bartkoweje serbsko-němskeje prosto němska čitanka.
