W serbskej literaturje chowaja so mnohe drohoćinki, na kotrež je trjeba znowa skedźbnić, zo njebychu so pozabyli. Wotpowědne impulsy chce awtorka serbskim čitarkam a čitarjam dawać.

Wězo nječitam słowniki a leksikony znowa, ale stajnje zaso do nich pohladam a w nich čitam. Wone su mi w powołanskim žiwjenju njeparujomny grat byli. Runje tak kaž mi je so mnohim lektorkam, redaktoram, wučerkam, duchownym, awtorkam, přełožowarjam, wědomostnicam a dalšim pisacym zešło. A tež nětko, hdyž na wuměnku něšto pisam abo přehladuju, trjebam słowniki a přiručki. Štóž sej serbsku rěč waži, spyta ju bjez zmylkow nałožować.