Zahrodkar, farar a wučer Christoph Schuster swójbny statok w Skanecach pola Malešec do přichoda wuhotuje
W Skanecach pola Malešec wobsedźi Christoph Schuster „Bróžnju jabłukow“. Přichodnje chce dom tematisce wužiwać. Nimo wědy wo jabłukach chce so tam tež Serbam a wěrje wěnować.Kaž kiće wisaja wone na štomach. Hałuzy so pod ćežkimi płodami zhibuja. Štomy połne jabłukow měješe Christoph Schuster lětsa na něhdźe 9,5 hektarow wulkej płoninje w Skanecach pola Malešec. „2025 je wuwzaćne lěto. Tajke bohate žně jabłukow hišće ženje njeběchu“, wjeseli so farar, wučer nabožiny a mišter štomownje. „To zaležeše na dobrym času, hdyž štomy w nalěću kćějachu. Wuměnjenja běchu idealne.“ Hordźe pokazuje wón na łužiske nalikowe jabłuko. Zeleno-čerwjene, słódke, juškojte jabłuka do pózdnjeho oktobra zrawja. Wone so jara dołho dźerža. Płody samo zymu přetraja, jelizo so fachowje derje składuja. Nimo družinow kaž kejžora Wilhelma, žołteho jabłuka abo princa Albrechta z Pruskeje słuša łužiske nalikowe jabłuko k historiskim na Christopha Schusterowych sadowych łukach.
