Spočatk lěta je sławna spěwarka Björk napisała, zo „žohnuje Grönlandźanow w jich wojowanju za njewotwisnosć, dokelž su Islandźenjo wodychnyli, hdyž su so w lěće 1944 wot Danskeje dźělili.“ A dale: „Njewotwisnosć Islandskeje je přežiwjenje mojeje rěče wuskutkowało, hewak bychu moje dźěći dźensa dansce rěčeli. Wěmy wo Grönlandskej, hdźež su so Danojo aktiwnje prócowali, grönlandski lud wutupić.“ Před lětomaj wozjewi britiski dźenik The Guardian, zo su danscy lěkarjo mjez 1966 a 1970 4 500 grönlandskim žonam a holcam wot dwanaće lět spiralu implementowali, zo by so mjenje dźěći narodźiło. A su Grönlandźankam narodźene dźěći preč wzali, zo bychu je dansce kubłali.