Lubin (SN). Štóž je zwučeny, při přistawje w Lubinje do turistiskeje informacije załožić, dyrbi so lětsa hinak orientować: Wokrjesne město wokrjesa Dubja-Błóta je financneje nuzy dla měšćanskej towaršnosći za turizm, kulturu a marketing přiražki šmórnyło. Dowolnikarjo móža nóclěh a poskitki dale přez Turistiski zwjazk Błóta skazać. Naprašowanja hosći wobdźěłaja w přichodźe tež sobudźěłaćerjo hrodu, zdźěli město, kiž njesmě tuchwilu žane njetrjebawše resp. dobrowólne wudawki měć. Dyrbja so na winowatostne nadawki koncentrować, turistiska informacija pak je prawnisce dobrowólna posłužba. Dźěłarnistwo ver.di kritizuje, zo njemóžeš kwalifikowanu a certifikowanu turistisku informaciju a management zarjadowanjow prosće druhim přistajenym nabrěmjenić. Kaž powěsćernja dpa piše, so mjeztym samo hospodarske ministerstwo w Podstupimje z naležnosću zaběra. Poskićowarjo woblubowaneho čołmikowanja na rozsud města rozdźělnje reaguja: Jedni so boja stratow za wikowarjow, korčmarjow a hotelownikow.