Jakubetzowy wustaw wosrjedź Kulowa njedaloko tamnišeho torhošća je kruta adresa, hdyž dźe wo kulturne, wólnočasne a dalekubłanske poskitki w regionje. Towarstwo Zjednoćeni za Kulow ma tu swoje doma.

Nimo swójskich projektow, kotrež towarstwo tu za wobdźělnikow w kóždej starobje poskićuje, stara so wone wo zdźerženje a ponowjenje domu, wo přenajeće rumnosćow. Sobudźěłaćerjo towarstwa poradźuja ludźi w zwisku z organizowanjom zarjadowanjow abo pomhaja při požadanju wo spěchowanske srědki za planowane projekty. W naposledk mjenowanej naležnosći je kompetentna Theresia Kliemankowa, jedna ze sydom čłonow předsydstwa towarstwa. Dohromady ma towarstwo cyłych 60 čłonow.