Punk a hardcore w Kamjencu

Kamjenc. Trójce punk a hardcore „stareje šule, ale nic bjez melodijow“ přilubi Kamjenski Safe Club dźensa, pjatk, přećelam twjerdšich, z rukami zwoprawdźenych zynkow. Wot 21 hodź. wustupja skupiny Concrete Lipstick z Drježdźan, Dead Simple z Halle nad Solawu a juwenilni lokalni matadorojo Schlimm. Swoje durje wotewri klub hižo w 20 hodź., zastup při wječornej kasy płaći – tohorunja cyle po „starej šuli“ – 5 eurow.

Historisce po łužiskich wjerškach

Wulke Rědorjecy. Domizniski zwjazk Lusatia a towarstwo Kulturprojekt Rödertal přeprošatej jutře, sobotu, na prěni z dohromady dwanaće přednoškow rjadu „Der Lausitzer Landweg – Ein historischer Wanderweg neu entdeckt“. Pod hesłom „Z Pastwineje hory na Běłobóh“ předstaji dr. Gabriele Lang zajimcam w 19.30 hodź. zajimawostki kołowokoło prěnjeje etapy hižo dlěje hač sto lět wobstawaceje pućowanskeje šćežki, kotraž zwjazuje wjerški Łužiskich horin mjez Wjazońcu, Kamjencom a Žitawu. Zarjadowanje wotměje so w něhdyšej radnej pincy bywšeje gmejny Bretning-Hauswalde, zastup je darmotny.