Do Łužicy je dóšła zrudźaca powěsć, zo je ameriski slědźer George R. Nielsen dnja 9. apryla w starobje 93 lět w Lewisville, Texas, zemrěł. Wón bě potomnik danskich kaž tež serbskich zapućowarjow do USA a čuješe so čas žiwjenja woběmaj narodnosćomaj zwjazany. Wo woběmaj je jako stawiznar tež powołansce slědźił.
Njeboćički narodźi so 29. meje 1932 we wjesnym sydlišću Aleman w Texasu. Jeho nan William Nielsen bě danskeho a jeho mać Emmy rodź. Mjerwic (Moerbe) bě serbskeho pochada. Na staršiskej farmje posrědkowachu so jemu trajne hódnoty swójbneje zhromadnosće, křesćanskeje wěry a wutrajneje dźěławosće. Wosebje wjele prócy žadachu sej za čas jeho dźěćatstwa kóžde lěto žně bałmy a hrocha.
George R. Nielsen wopyta Concordia College w Sewardźe, Nebraska. Tomu přizamkny so akademiski studij na uniwersitomaj w Houstonje a w Iowa City, kotryž wotzamkny z promociju. Powołansce skutkowaše jako wučer na lutherskich šulach, spočatnje w texaskim Houstonje a wot 1959 hač do wotchada na wuměnk 1997 na Concordia University w River Forest, Illinois, předměsće metropole Chicago.
