aš 7. lětnik ma wosebitosć: W 6. lětniku buštej dwě skupinje z čěšćinu a jedna skupina z francošćinu jako druhej cuzej rěču zarjadowanej. Z tohole rěčneho wusměrjenja zrodźi so ideja, jězbu tychle skupin 7. lětnika do Čěskeje organizować – a to blisko našeho partnerskeho gymnazija we Warnoćicach. Tak wjedźeše nas lětuša rjadowniska jězba na tři dny do prózdnin­skeho centruma „Babočka“ w Chřibskej, wosrjedź krasneje přirody Čěskeje Šwicy.

Přebywanje započa so póndźelu, 22. junija. Z dwěmaj busomaj docpěchmy wokoło 9.15 hodź. ležownosć a zaćahnychmy do swojich hětow – stajnje štyri šulerki a šulerjo sej přebytk ­dźělachu. Po tym areal wuslědźichmy a spěšnje zwěsćichmy, zo su sportowe móžnosće mnohostronske: Bičwolejbulnišćo, swimmingpool a trampolin postarachu so wo dosć pohibowanja a wjesela.