K 100. posmjertninam serbskeho prócowarja Awgusta Lapšticha-Wojerowskeho

Zawod

Župa „Handrij Zejler“ spomina lětsa we wobłuku projekta „Via Sorabica HoyWoj“ na wusahowacu wosobinu serbskich stawiznow města Wojerecy. Dnja 13. julija 1926 zemrě we Wojerecach knihićišćer, wobsedźer ćišćernje, redaktor a serbski prócowar kaž tež angažowany měšćan Awgust Lapštich (1862–1926). Připisam jemu přidawk „Wojerowski“ tohodla, dokelž hrozy strach, zo so wón z něhdyšim wjesnjanostu 1931 wotbagrowaneje serbskeje wsy Bukojna ze samsnym mjenom (1883–1962) zaměni. Wužiwam składnosć 100. posmjertnin Wojerowskeho Lapšticha, zo bych jeho serbske skutkowanje wobswětlił. W tutym artiklu pak so koncentruju a wobmjezuju na jeho narodny skutk w pruskej Hornjej Łužicy, kotryž wězo tež na cyłe Serbstwo wuprudźeše.

Serbski pochad