Budyšin (SN/MiR). Swjedźeń poezije na česć 170. posmjertnych narodnin Jakuba Barta-Ćišinskeho zašłu sobotu běše zetkanje přećelow, kotřiž so dlěje widźeli njejsu abo kotřiž běchu so tón wječor zeznali. Benedikt Dyrlich, kotryž je swjatk z někotrymi zwjazkarjemi přihotował, nawjaza ze zarjadowanjom na wjelelětnu tradiciju swjedźenjow. Nade wšěm steješe baseń Ćišinskeho, „Próstwa“, kotruž wšelacy basnicy přitomnym w hornjo- a delnjoserbsce, němsce, pólsce, čěsce a rusce přednjesechu. W kruhu čitacych napadnychu skerje nje­znate mjezwoča, mjez kotrymiž běše Frank Norten. W swojich basnjach, wudatych we wjacorych zběrkach a wšelakich rěčach, rysuje wón swoje wobkedźbowanja čłowjeskich nje- resp. dokonjanosćow. Uwe Kolbe skedźbnješe na wuznam Kita Lorenca za serbsku literaturu a Christoph Kuhn na Elku Erb, kotraž měješe we Wuježku swój literarny refugij. Mjez awtorami běše tež Rusowka Olga Martynova, nošerka myta Ingeborg Bachmann. Serbska awtorka Sara Zellerec čitaše wurězk ze swojeho teksta „Na dwórnišću a wšudźe druhdźe“.