Njewšědny miks wjelorakosć serbskeje (sub)kultury wotbłyšćowała

Miłoćicy (SN/bn). Třeći raz wotmě so minjeny kónc tydźenja festiwal Witaj při Miłočanskej skale, a facitej iniciatora Jakuba Čornaka – kaž jakny jón tež sformulował – bychu wobdźěleni hudźbnicy, wuhotowarjo workshopow, akterojo za kulisami a wjetšina wopytowarjow bjezdwěla přihłosowali: „Wutrobny dźak wšěm, bě jara cool, sym zbožowny!“ Hižo do oficialneho zazběha wuměnichu so kulturnicy na přeprošenje iniciatiwy SEŚ – nowa serbska muzika nastupajo potenciale łužiskeho kreatiwneho hospodarstwa. Přezjedni sej běchu, zo je w tym zwisku digitalna distribucija drje dale najwažniša hałuza. Na „klasiske“ wašnja pak so zabyć njesmě, kaž přiběrace naprašowanje na přikład za „fyzikaliskimi“ zynkonošakami pokazuje.