Wojerecy (SN/MiR). Partnerstwo za demokratiju (PfD) Wojerecy spěchuje lětsa wospjet předewzaća we wobłuku fondsa za mikro-, akciske a iniciatiwne projekty. Wosebje młodostni su namołwjeni, swoje ideje zapodać. Pjenjezy hodźa so za ponowjenje młodźinskeho kluba abo zarjadowanja mj. dr. wo temach kaž demokratija a rozrisanje konfliktow, za zhromadnosć a přećiwo hidźe wužiwać. PfD spěchuje dźěłarnički, akcije, kreatiwne projekty kaž tež kubłanske poskitki. Wobsahi móhli na přikład dźěćace a čłowjeske prawa, wobchad z digitalnymi medijemi, škit před ekstremizmom, strategije rozrisanja konfliktow atd. być. K tomu słušeja ideje, kotrež sobupostajowanje a wobdźělenje spěchuja a so z lokalnymi wužadanjemi rozestajeja. Witane su wosebje projekty, kotrež dźěći a młodostni zwoprawdźeja. Zajimcy njech informuja so na webstronje Demokratie-hy.de. Tam nańdu wšitke trěbne informacije a wuměnjenja, kotrež su za spěchowanje trěbne. Dale zhonja wo postupowanju při zapodaću próstwy. Zdobom su tež terminy zapisane, kotrež maja próstwystajerjo dodźeržeć.