Ze stupacymi temperaturami započina so za mnohich młodostnych kupanska sezona. Hač po šuli, kónc tydźenja abo w prózdninach – kupjele, jězory a skały su najwoblubowaniše wulětowe cile w lěću. Tola kóžda kupanska móžnosć njeskići samsne wuměnjenja za poradźeny dźeń. Měritko za njón su kwalita wody, poměr mjez płaćiznu a wukonom, wěstota a wólnočasne poskitki. Tohodla staj młodźinskej redaktoraj Linus Hrjehor a Milan Jurk wšelake kupanske móžnosće wuspytałoj a je po kriterijach hódnoćiłoj. Wuslědk testa pokazuje, kajke móžnosće su jeju přeswědčili a hdźe móhło so něšto polěpšić.
Bjerwałdski jězor
Prěnja a zawěsće tež najznaćiša móžnosć k wochłódźenju je Bjerwałdski jězor. Tutón skići dobru móžnosć ke kupanju, dokelž je woda při přibrjohu wosebje čista a přewidna. Wěstota je poměrnje derje zawěsćena, dokelž maš płone pěskowe přibrjohi a wuchowansku słužbu. Jenički špatny kriterij je zdalenosć, kotraž žada sebi přijězd z awtom. Runje tak faluje action-faktor w formje suwadła abo skakanskeje wěže.
