Budyšin (SN/bn). Spěwytwórc Rokotak je předwčerawšim swój aktualny album „Kommen ist wie gehen“ na Kulturnej zahrodźe Serbskeho ludoweho ansambla předstajił. Lětsa jako CD kaž tež jako klasiska winylowa tačel pola labela Djummi wušły, na znatych portalach tež online přistupny zynkonošak wopřijima jědnaće titulow, chabłajo mjez bluesom a rockom. Hudźbnje drje su na přikład Chris Rea a Element of Crime kmótřili. Teksty wotbłyšćuja wobkedźbowanja wšědneho dnja a towaršnostnych zjawow kaž tež zhladowanja na swójsku zańdźenosć. W tym zwisku dowoli sej Rokotak mały žort, jako spěw „Regenvariante“ takrjec jako zjimanje swojich dotalnych dožiwjenjow z Kulturnej zahrodu připowědźi: „W minjenych lětach zesylni so poněčim zaćišć, zo buch jenož přeprošeny, zo by so tudyši trawnik raz porjadnje powodźił.“ Tónraz wšak ani jenička mróčałka koncert njezamući. Tak zamó hudźbnik cyłu tačel dospołnje prezentować.