Ulan Bator (dpa/SN). Bamž Franciskus je k zahajenju swojeje jězby do Mongol­skeje w stolicy Ulan Batoru dojěł. 86lětny je dźensa rano z wosebitej mašinu italskeho lětarskeho předewzaća Ita w monglskej stolicy přizemił. Tam wi­taše jeho wonkowna ministerka Batmunkh Battsetsegund. Młoda žona přepoda bamžej nopašk ze sušenym jogurtom, mongolskej wosebitostku. Je to tradicionalne wašnje witanja w kraju.

Je to prěni wopyt bamža w stawiznach w druhim najwjetšim kraju swěta bjez mórskeho pobrjoha. Bamž wostanje tam hač do póndźele. Dźensa nima wón po napinacej jězbje žane terminy planowane. Jutře chce so wón z wodźacymi zastupnikami stata zetkać. Po tym chce so wón z narěču na wobydlerjow wobroćić a so z duchownymi zetkać. W běhu wopyta wočakuja tež zetkanje mjez wjacorymi nabožinami, na kotrymž chce so tež farar rusko-prawosławneje cyrkwje w Ulan Batoru wobdźělić.

Najnowše woprašowanje cyle jasnje pokazuje, zo wobsteji direktny zwisk mjez raznje woteběracej spokojnosću ludźi z dźěłom zwjazkoweho knježerstwa a přiběracej nahladnosću AfD. Po wšej Němskej docpěwa strona mjeztym rekordne 22 procentow a w Sakskej samo 35 procentow. Wuspěchi AfD pak zdobom dopokazuja, zo njejsu wšitke paniske naprawy přećiwo njej dotal ničo wunjesli: Wolerjam AfD wumjetować, zo su klepnjeni, je runje tak njewunošne kaž wšě prócowanja wustawoškita, stronu do prawicarsko-ekstremistiskeho róžka stłóčić. Kak by město toho z rozumnej politiku było? Ludźo maja toho prosće dosć, zo jim w Berlinje kazaja, kak maja přichodnje žiwi być. Hač energijowa změna, wobchadna změna abo tepjenski zakoń – dźeń a bóle so zdawa, zo mamy z politikarjemi činić, kotřiž wo woprawdźitym žiwjenju ničo njewědźa a kotřiž wjedu Němsku runjewon do katastrofy. Wjele chwile za zasadnu změnu wjace nimaja. Marko Wjeńka

Pod hesłom „Na slědach serbskich komponistow“ je renoměrowane mjezynarodny Simply Quartet wčera we wobłuku Łužiskeho festiwala we Wojerowskej Kulturnej fabrice koncertował. Mištersce zahra štyri z „Dźesać serbskich rejow“ Jana Paula Nagela a štyri wobrazy cyklusa „Ze serbskeje hole“ Bjarnata Krawca. Dale zahori publikum z twórbomaj „Métamorphoses nocturnes“ Györgyja Ligetija a „Smyčkowy kwartet čo. 13“ Antonína Dvořaka. Přichodnej koncertaj festiwala stej „Latin Jazz par excellence“ z pianistom Michelom Camilom w Dornsdorfskej briketowni Louise a „Vocal fusion“ z ansamblom Roomful of Teeth w Choćebuzu. Foto: Nikolai Schmidt

Berlin (dpa/SN). Komplikowane němsko-pólske stawizny a brutalne němske wobsadnistwo za čas Druheje swětoweje wójny chcedźa přichodnje w nowym dokumentaciskim centrumje w Berlinje wopominać. Koncept „Němsko-pólskeho domu“ je kulturna statna sekretarka Claudia Roth minjenu wutoru zhromadnje ze załožbu Pomnik za morjenych Židow Europy předpołožiła. Hač k zwoprawdźenju projekta drje hišće wjacore lěta zańdu.

Nowa institucija ma po wobsahu na třoch stołpach stać: Wona ma informacije poskićeć, městnosć zetkawanja a zdobom z „markantnym wuměłskim elementom wopomnišćo być“, w koncepće rěka. Jako móžne městno mjenuja naměsto bywšeje opery Kroll w susodstwje kanclerskeho zarjada a Reichstaga. Tam bě Hitler 1. septembra 1939 swoju narěč k nadpadej na Pólsku dźeržał. Dom ma na namócnu smjerć wjace hač pjeć milionow Polakow – mjez nimi třoch milionow Židow – dopominać, ale tež na wšědny dźeń Polakow za čas němskeho terora a na jich spjećowanje. Tež dźensniši nowy poměr mjez krajomaj chcedźa wobswětlić.