Duchowneho a wótčinca wopominali
To a tamne (26.04.21)
Dwě hodźinje trajace zawrjenje tunla je skupina motorskich w Porynsko-Pfalcy zawiniła. Wotpłuny mašinow běchu awtomatisku wohnjoškitnu připrawu njedaloko městačka Bernkastel-Kues aktiwizowali, na čož so wrota tunla zawrěchu. Wohnjowa wobora dyrbješe za nadróžny wobchad wobjězdku zarjadować.
Jedyn z prěnich eksemplarow twjerdych dolarow z lěta 1794 su na awkciji w USA za nimale 700 000 eurow přesadźowali. Rědki koporowy pjenjez je prototyp pozdźišeho slěborneho dolara, kaž awkciski dom Heritage Auctions w texaskim Dallasu informuje. Hódnotu twjerdeho pjenjeza z priwatneje zběrki předewzaćela běchu fachowcy na połojcu wuzbytkowaneje sumy trochowali. Je to jedyn z prěnich eksemplarow tehdy noweje pjenjezarnje USA w Philadelphiji.
Akciske tydźenje dale powjedu
Před połdra měsacom je Budyska
Žonjaca iniciatiwa zhromadnje z wjacorymi partnerami akciske tydźenje „KONTAKT MACHT NEUES“ zahajiła. Nětko dojednachu so na pokročowanje.
Budyšin (SN/bn). „Nochcychmy dźeń žonow w lockdownje takrjec nimoducy a bjez komentara přeńć. Tohodla planowachmy rjad mjeńšich projektow, z kotrychž pak je něšto wjetšeho wurostło. Dale trajacych wobmjezowanjow dla smy so rozsudźili akciske tydźenje dźensa njezakónčić, ale pod hesłom ‚Žonjacy dialog – Wostawamy w kontakće‘ z nimi pokročować“, podšmórny hosćićelka wčerawšeho wirtuelneho zetkanja aktiwistkow Sabrina Baumann. Tohodla poda wona tuž „mjezyfacit město kónčneje bilancy“. Wuspěšnej zarjadowani we wobłuku akciskich tydźenjow běštej po jeje słowach mjez druhim „derje wopytany digitalny forum ‚Demokratija trjeba demokratki‘ a premjera kreatiwneho wideja ‚Nalětnja kwětka‘ .“
Rekordne zadołženje schwalene
Berlin (dpa/SN). Zwjazkowy sejm je dźensa dodatny etat z nowym zadołženjom 60,4 miliardow eurow schwalił. Tak móže financny minister Olaf Scholz (SPD) lětsa rekordny kredit 240 miliardow eurow wzać. Dodatny etat předwidźi wjace pjenjez jako pomoc předewzaćam a na dobro strowotnistwa, na přikład za wobstaranje šćěpiwa a za pomoc swójbam. Za etat hłosowaše koalicija CDU/CSU a SPD. Přećiwo tomu běchu FDP, Lěwica a AfD. Zeleni so hłosa wzdachu.
Ruska wojerske jednotki cofnje
Moskwa (dpa/SN). Po wjele diskutowanych wojerskich manewrach na čornomórskej połkupje Krim Ruska swoje za akciju přepołožene wojerske jednotki cofnje. Wojacy, kotřiž běchu so na zwučowanju wobdźělili, so zaso do swojich kasernow wróća, zdźěli zakitowanske ministerstwo w Moskwje. Wojersku techniku chcedźa z łódźemi, železnicu a lětadłami wottransportować. Ruski zakitowanski minister Sergej Šojgu je wotćah jednotkow wčera připowědźił.
Afghanistanej dale pomhać
Merz: Prošu wostańće w CDU!
Merkel skazana
Kretschmer Sputnik V skazał
Moskwa (dpa/SN). Sakski ministerski prezident Michael Kretschmer (CDU) je na swojim wopyće w Ruskej z tamnišim prezidentom Wladimirom Putinom telefonował. W rozmołwje rěčeštaj wobaj mjez druhim tež wo boju přećiwo koronapandemiji. Putin potwjerdźi zwólniwosć ruskeje strony, z němskimi partnerami při dodawanju šćěpiwa a jeho zhotowjenju hromadźe dźěłać, kaž rěčnik Krjemla wčera zdźěli. Ale tež konflikt na Ukrainje a połoženje w chłostanskim lěhwje zajateho opozicionalneho Alekseja Nawalneho staj Putin a Kretschmer wobrěčałoj. Wobaj dypkaj němsko-ruske poćahi tuchwilu chětro poćežujetej.
Po rozmołwje z ministrom za strowotnistwo Michailom Muraškom Michael Kretschmer připowědźi, zo chcyła Němska 30 milionow dozow ruskeho šćěpiwa Sputnik V kupić. Wuměnjenje je dowolnosć Europskeho zarjada za dohladowanje lěkow, kotruž wočakuja w meji. Kretschmer z toho wuchadźa, zo Saksojo ruske šćěpiwo přećiwo koronawirusej wulce witaja.
Plany biskopstwa za nowy ordinariat předstajene
Drježdźany (SN/JaW). Swoje plany wo móžnym nowotwarje ordinariata je Drježdźansko-Mišnjanske biskopstwo na zjawnym internetnym słyšenju předwčerawšim, srjedu, předstajiło. K zazběhej třihodźinskeho zarjadowanja rjekny generalny wikar biskopstwa Andreas Kutschke, zo zaměr mjez druhim je „zjawnosć informować, wo čim smy rozmyslowali, što je planowane a předwidźane“.
Biskopstwo ma w sakskej stolicy dwě imobiliji – jednu na Hasy Käthy Kollwitz a jednu na Schwerinskej dróze –, kotrejž stej dodźeržanej. Nimo toho maja we woběmaj njesměrne kóšty za reparatury nałožić, lětnje maja za nje 75 000 eurow zaplanowane.
To a tamne (23.04.21)
Dźesać paletow čriji spakosćili su paduši na parkowanišću při awtodróze A 13 njedaloko Drježdźan z připowěšaka Lkw-ja. 46lětny šofer bě swoje nakładne awto na parkowanišću Finkenberg w Mišnjanskim wokrjesu wotstajił a so spać lehnył. Narano pak wón zwěsći, zo su njeznaći planu awta rozrězali a palety črijow w cyłkownej hódnoće 20 000 eurow pokradnyli.
Hižo zaso su wopicy ze zwěrjenca w badensko-württembergskim Löffingenje twochnyli. Sobudźěłaćerjo móžachu tři ze štyrjoch wopicow na bliskej zwjazkowej dróze popadnyć. Prawdźepodobnje běchu zwěrjata wokoło twarnišća w zwěrjencu móžnosć namakali so zminyć. Hakle před tydźenjomaj bě wjace hač 20 berberskich wopicow z mjenowaneho coowa ćeknyło. Wone su spłóšiwe a bojazliwe. Móža pak agresiwnje reagować, čuja-li so wohrožene.
Serbja njejsu „drěmacy pokład“
Drježdźany (SN/bn). „Młody a serbski – perspektiwy přichoda za Serbow“ bě hesło zakónčaceho digitalneho zarjadowanja rjadu „Serbja we Łužicy – Drěmacy pokład w Sakskej“ Politiskeho kubłanskeho foruma Konrada Adenaueroweje załožby. Po naprašowanju hosćićelow-moderatorow Johanny Hohaus a Benedikta Bierbauma běchu dwě třećinje dohromady něhdźe 70 přihladowarjow Serbja.
Předsyda Domowiny Dawid Statnik rozłoži přitomnym stawizny, natwar, nadawki a wuhlady třěšneho zwjazka serbskich towarstwow, kotrehož předstaji jako „najwjetše a najsylniše zjednoćenstwo serbskeje ciwilneje towaršnosće a prawnisce připóznateho zastupjerja zajimow serbskeho ludu“. Hladajo na temu wječora wón wuzběhny, zo „je zwjeselace, kelko młodźinskich towarstwow je w minjenym času Domowinje přistupiło. Młodźina smě wšitko do prašenja stajić, smě wšitko znowa wunamakać, změnić, wotstronić – ale prošu serbsce!“
