Za wjace pomocy wowčerjam
Braniborska na konferency wobswětowych ministrow namjet zapodała
Podstupim (dpa/SN). Braniborska chce za wjace pomocy zwjazkowych krajow plahowarjam wowcow nastupajo škit před wjelkami wabić. Wotpowědny namjet je na wčerawšej konferency wobswětowych ministrow w Hamburgu zapodała. Při tym dźe wo to, wudźeržowanje škitnych naprawow kaž płotow, ale tež psow stoprocentnje financować, informuje rěčnik wobswětoweho ministerstwa. Dotal spěchuja w Braniborskej jenož nakup płotow a psow. Wot spočatka lěta su wjelki w Braniborskej 74 wowcow zakusali. Loni bě jich cyłkownje 235.
Pomocne pjenjezy móhli z fondsa ministerstwow za ratarsku strukturu k wuwiću wjesnych kónčin brać. Sumu, kotruž z fondsa za to nałoža, dyrbjało zwjazkowe knježerstwo zaso narunać, rěčnik zdźěli. Po jeho słowach běchu zwjazkowe kraje hižo do zetkanja w Hamburgu signalizowali, zo namjet Braniborskeje podpěraja.
Kak EU regiony spěchuje
Tusk Havela počesćił
Praha (dpa/SN). Do dźensa zahajeneho wjerškoweho zetkanja Europskeje unije w rumunskim měsće Sibiu wo přichodźe zjednoćenstwa statow je so prezident Rady EU Donald Tusk na Václava Havela powołał. Wón citowaše lěta 2011 zemrěteho bywšeho čěskeho a čěskosłowakskeho prezidenta na wopyće w Praze, zo stej swoboda a zamołwitosć dwě stronje samsneje medalje. „Z tym je wón dokładnje to zapřimnył, što rěka Europjan być“, rjekny Tusk. Na programje 52lětneho pólskeho politikarja steješe tež wopyt rowa wojowarja wo čłowjeske prawa a dramatikarja.
Hosćićel Tuska, čěski ministerski prezident Andrej Babiš, žadaše sej w přichodnej dobje financowanja wjetši wliw na přizwolenje spěchowanskich srědkow EU. „Předewšěm my měli rozsudźić, za čo pjenjezy wužiwamy, kotrež z Europy dóstanjemy“, rjekny załožer populistiskeje strony ANO. Ratarski imperij Babiša ma sobu najwjetše lěpšiny ze subwencijow Europskeje unije. Najebać to jej wjace hač połojca Čechow po wuslědkach naprašowanjow njedowěrja. Tusk mjenowaše to „strowu měru skepticizma“.
To a tamne (09.05.19)
Wowcy město trawusyčakow chce město Wien přichodnje na Dunajskej kupje zasadźić. 50 wowcow změje na woblubowanym wólnočasnym arealu přichodnje swój wot wowčerja dohladowany domicil. Hinak hač dotal wužiwane bencinowe mašiny su wowcy wobswětej přichilena alternatiwa, z Wienskeje radnicy rěka. Dunajska kupa je 21 kilometrow dołha a lědma wobtwarjena.
Wotćišć porsta na torće je paducha w Kölnje přeradźił. Sudnistwo je předchłostaneho muža mjeztym k wosom měsacam jastwa zasudźiło. Wotćišć porsta na šokolodźanej torće bě jenički dopokaz w procesu. 43lětny bě so loni zhromadnje z kumpanom do bydlenja zadobył a je wurubił. W kuchni da so muž do žiwidłow, mjez druhim do torty. Jako so wobsedźer nawróći, wuhlada wón wotćišć a tykny tortu do chłódźaka.
Zrěčenje zdźěla wupowědźili
Teheran (dpa/SN). Runje lěto po wupowědźenju mjezynarodneho atomoweho zrěčenja z Iranom přez USA je iranski prezident Hassan Ruhani zdźělił, zo nječuje so jeho kraj na dźěle zrěčenja hižo wjazany. Po informacijach medijow je wón tónle rozsud Chinje, Němskej, Francoskej, Wulke Britaniskej a Ruskej pisomnje posrědkował. Ruhani na to skedźbni, zo je Iran cyłe lěto wočaknył, zo móhli mjenowane kraje wliw na USA wukonjeć zrěčenje tola dale dodźeržeć.
Pompeo widźi wohroženje
Washington/Bagdad (dpa/SN). Wonkowny minister USA Mike Pompeo je wčera wječor njewočakowano Irak wopytał a za to swój planowany wopyt Němskeje wotprajił. W Bagdadźe zetka so ze zastupnikami irakskeho knježerstwa, zo by z nimi přiběrace napjatosće ze susodnym Iranom rozjimał. Napřećo žurnalistam rěčeše Pompeo wo „bjezposrědnim wohroženju“ ze stron Irana. Hakle před dnjemi běchu USA lětadłonošak do tamnišeje kónčiny pósłali.
Šuler při nadpadźe zatřěleny
W schleswigsko-holsteinskim Alt Duvenstedće zrazy dźensa rano ...
Wuchod skerje za wobydlerske hibanja
Berlin (dpa/SN). Ludźo na wuchodźe Němskeje wužiwaja po wuslědkach najnowšeho přepytowanja hinaše móžnosće, zo bychu so na politiskim žiwjenju wobdźělili, hač na zapadźe. Kaž z wčera wozjewjeneje rozprawy w nadawku hospodarskeho ministerstwa Zwjazka wuchadźa, artikuluja wuchodni Němcy swoje politiske zajimy skerje we wobydlerskich hibanjach, na platformach abo na dróze. Institucije, kotrež politiske nastajenje zastupuja, kaž strony, dźěłarnistwa, zwjazki abo cyrkwje, su po tutej rozprawje na wuchodźe słabšo nastajene hač na zapadźe. Zajim za politiku powšitkownje pak wostawa na wuchodźe a zapadźe dale na jenak wysokim niwowje.
Busowi šoferojo stawkuja
Drježdźany (dpa/SN). Warnowanske stawki w regionalnym linijowym wobchadźe su so dźensa po wšej Sakskej wuskutkowali. Rano w dwěmaj běchu prěni sobudźěłaćerjo w Drježdźanach a Kamjenicy dźěło złožili, kaž dźěłarnistwo ver.di informuje. Hač do 7 hodź. je so něhdźe 1 800 sobudźěłaćerjow po wšej Sakskej na stawku wobdźěliło.
Po zdźělenju dźěłarnistwa maja šoferojo busow a tramwajkow, zamkarjo kaž tež přistajeni a wučomnicy 24 hodźin stawkować. Ver.di liči z 2 500 wobdźělnikami. Hižo 10. a 25. apryla běchu stawki zapozdźenja zawinowali.
Dźěłarnistwo žada sej wot zwjazka dźěłodawarjow za bliskowobchad wyše mzdy a wjace pjenjez za wučomnikow. Po informacijach dźěłarnistwa zasłužeja busowi šoferojo na hodźinu 12,30 eurow. Mzda měła so na 15,66 eurow zwyšić. Přichodne koło jednanjow je jutře. Stawk měješe dźensa rano tež wuskutki mjez druhim na chowancow Budyskeho Serbskeho gymnazija, kotrychž su starši z awtom do šule wjezli.
Za šćěpjenje přećiwo wosypicam
Sakska namjetej ministra Spahna přihłosuje – Braniborska čaka na zakoń
Drježdźany/Podstupim (dpa/SN). Zakonski naćisk zwjazkoweho ministra za strowotnistwo Jensa Spahna (CDU) nastupajo winowatostne šćěpjenje přećiwo wosypicam pola pěstowarskich a šulskich dźěći kaž tež pola lěkarskeho a šulskeho personala žněje w Sakskej přihłosowanje. Strowotniska ministerka Barbara Klepsch (CDU), krajna lěkarska komora kaž tež frakcija Lěwicy w sakskim sejmje namjet z Berlina witaja. Jens Spahn chcył šćěpjenje z pjenježnym chłostanjom hač do 2 500 eurow a z wuzamknjenjom z pěstowarnje přesadźić.
„Trjebamy winowatosć šćěpjenja přećiwo wosypicam, a to nětko“, praji Barbara Klepsch. Z dobrym přirěčowanjom a informaciskimi kampanjemi njeje trěbne šćěpjenje 95 procentow wobydlerstwa zwoprawdźomne. Winowatosć šćěpjenja w pěstowarnjach, šulach kaž tež pola medicinskeho a pedagogiskeho personala je runje prawy puć, dokelž je tam strach natyknjenja najwjetši, ministerka měni.
Strašna eskalacija
Chětro zaměrnje USA na tym dźěłaja, napjatosće z Iranom přiwótřić. Před lětom su wone mjezynarodne atomowe zrěčenje jednostronsce wupowědźili a Iranej nowe sankcije napołožili. Nětko su pječa zwěsćili, zo planuje Iran nadpad na staćanow USA w Iraku, a su jako znamjo wottrašenja hižo raz lětadłonošak a staflu bombowcow do regiona pósłali. Čłowjek chcył USA na to dopominać, zo njeje Iran w nowšich stawiznach hišće nihdy swojeho susoda nadpadnył. Na tamnym boku su USA lěta 2003 Irak nadpadnyli, štož bě jasne ranjenje mjezynarodneho prawa. Tež tam chcychu wšemu swětej napowědać, zo Sadam Hussein swět z jědojtym płunom wohroža, štož so pozdźišo jako hotowa łža wukopa. Sym wćipny, što su sej tónraz wumyslili. Mjezynarodne zjednoćenstwo statow dyrbjało spěšnje jednać, zo njeby k strašnej eskalaciji ze zahubnymi sćěhami za nas wšěch dóšło.
Marko Wjeńka
