Policiju wutriksować spytałoj staj mužej z wosobowym awtom w Zwickauwje. Jako wonaj zastojnikow wuhladaštaj, skrótka pozastaštaj, zo byštaj městno za wodźidłom měnjałoj. Manewer pak policistam napadny. Při kontroli woni zwěsćichu, zo njeměješe prěnjotny, 24lětny wodźer awta žanu jězbnu dowolnosć. Tež tamny, 44lětny njeby z awtom jěć směł, dokelž steješe pod wliwom drogow.
„Swjateho drogowych wikowarjow“ su kónc tydźenja w Mexiku počesćili. Składnostnje 110. posmjertnin Jesúsa Malverdy njesechu ludźo postawu legendarneho bandita w procesionje po dróhach města Culiacán a donjesechu ju do kapałki. Tam zaswěćichu swěčki a kidachu whisky na čoło „swjateho“. Malverde (1870–1909) bě swój čas bohatych wurubjał a rubiznu mjez chudymi rozdźělił. 3. meje 1909 su policisća jeho morili. Jeho žiwjenje je zwjazane z wjele legendami.
Frankfurt n. M. (dpa/SN). Zamołwići za wěstotu z Europy a USA su zhromadnje online-wikowanišćo ilegalnych tworow zničili. Bě to pječa po wšěm swěće druhe najwjetše wikowanišćo w tak mjenowanym darkneće. Na platformje „Wall Street Market“ běchu skućićeljo z kradnjenymi datami, falšowanymi dokumentami a wosebje z drogami wikowali, kaž statne rěčnistwo w Frankfurće nad Mohanom zdźěla. Třoch muži z Hessenskeje, Badensko-Württembergskeje a Sewjerorynsko-Westfalskeje su zajeli.
Kühnert tezy wobkrućił
Berlin (dpa/SN). Předsyda Młodych socialdemokratow Kevin Kühnert je napřećo nowinarjam swój apel přećiwo kapitalizmej wospjetował. „Štož sym rjekł, sym jara chutnje měnił“, praji Kühnert časopisej Spiegel. „Kapitalizm je so do přewjele žiwjenskich wobłukow předrěł. Tak njemóžemy dale činić“, wón rjekny. W rozmołwje z nowinu Zeit bě Kühnert wo wuswojenju wulkopředewzaćow a bydlenskich koncernow rěčał a tójšto kritiki předewšěm z hospodarstwa žnjał.
Ludźo EU dla pačeni
Niamey (dpa/SN). Zwjazkowa kanclerka Angela Merkel (CDU) je žadanje madźarskeho ministerskeho prezidenta Viktora Orbána wotpokazała, zo měła Europska ludowa strona (EVP) nowej prawicarskej aliancy šefa italskeje strony Lega Matteja Salvinija w Europskim parlamenće přistupić. Merkel podpěruje cyle jasnje wuprajenja načolneho kandidata Manfreda Webera (CSU), zo njebudźe po wólbach „žaneje kooperacije z prawicarskimi stronami“, rjekny wona hladajo na wólby Europskeho parlamenta 26. meje. Merkel dopominaše na to, zo je EVP stronu Fidesz Orbána wuzamknyła. Angela Merkel wupraji so k tomu w Niameyju, stolicy Nigera. Tam bě ju prezident kraja Mahamadou Issoufou přijał.
Prawicarskonacionalny Orbán bě na zhromadnej nowinarskej konferency ze Salvinijom rjekł: „Rozsudne je, štó je za migraciju a štó přećiwo tomu.“ Strony zlěwa EVP su za migraciju, strony na prawym boku, mjez nimi wot Salvinija planowana Alianca ludow a narodow, přećiwo njej. EVP dyrbjała so tuž wo zhromadne dźěło z blokom Salvinija prócować, wón praji. Blokej chcyła tež AfD přistupić.
Smjerdźateho wotpadkoweho měcha we wochěži dla je so muž we Wienje pola policije hóršił a bě krótko po tym sam w jastwje. Jako chcychu zastojnicy personalije 36lětneho přepruwować, bu tón widźomnje nerwozny a chcyše woteńć. Policisća pak zwěsćichu, zo jedna so wo paducha, za kotrymž hižo dołho pytaja. Nětko sedźi w přepytowanskej jatbje. Wotpadki bě susod prosće zabył.
Inženjerski twarski nadawk z rekordnymi rozměrami chcedźa njedaloko sewjerorynsko-westfalskeho Siegena zwoprawdźić: Tam planuja, 100 000 tonow ćežki awtodróhowy móst wo 20 metrow přestorčić. Objekt je tuž nimale tak ćežki kaž Kölnska katedrala, kotruž trochuja na 120 000 tonow. Tajki twar njejsu dotal w Němskej hišće přesunyli, kaž zarjad za dróhotwar zdźěla. Akcija w lěće 2022 ma dwaj dnjej trać.