Berlin (dpa/SN). Pod wulkim ćišćom stejaca předsydka SPD Andrea Nahles powyšenje prezidenta zwjazkoweho wustawoškita Hansa-Georga Maaßena na statneho sekretara raznje kritizuje. „Mam to za ćežko zrozumliwe a za wopačne“, rjekny Nahles wčera wječor w telewiziji ZDF. Zdobom pak wona zakitowaše, zo je rozsudej nutřkowneho ministra Horsta Seehofera (CSU) přihłosowała, dokelž njebě zwólniwa tajkeje personalije dla knježerstwo woprować, „najebać wšě bolosće, kotrež to načinja“. Zwjazkowa kanclerka Angela Merkel (CDU) mjenowaše wotwołanje Maaßena na čole wustawoškita „prawy a wažny rozsud“.

Powyšenje Maaßena je w SPD masiwne spjećowanje zbudźiło a wohroža přichod wulkeje koalicije. SPD bě sej Maaßenowych wuprajenjow w zwisku z namócnosćemi w Kamjenicy dla žadała, jeho wotwołać. Seehofer jeho zakitowaše. Wutoru běchu so dojednali, zo Maaßena jako statneho sekretara do nutřkowneho ministerstwa přesadźa. Za to je Horst Seehofer statneho sekretara Gunthera Adlera, čłona SPD a fachowca za bydlenje a twarstwo, nachwilnje pensionował, štož w SPD přidatny hněw zbudźa.

Salzburg (dpa/SN). Bjez wuslědkow nastupajo migraciju skónči so wčera prěni dźeń wjerškoweho zetkanja Europskeje unije w Salzburgu. Kaž prezident komisije EU Jean-Claude Juncker powěsćerni dpa rjekny, njejsu so rozdźělne pozicije jednotliwych krajow zbližili. Temu chcychu dźensa dale wobjednawać. Cyłkownje 28 statnych a knježerstwowych šefow je pjeć hodźin diskutowało, zo bychu prašenje rozrisali, kak z wuchowanymi ćěkancami wobchadźeć.

Dalša wusahowaca tema bě planowany wustup Wulkeje Britaniskeje z Europskeje unije. Premierministerka Theresa May wabješe za swoje plany, kotrež předwidźa tež po brexiće dale wuske hospodarske styki z EU. Wona žadaše sej wot EU wjace zwólniwosće ke kompromisam. To samsne wočakuje prezident Rady EU Donald Tusk wot Wulkeje Britaniskeje. Wjele chwile wjace njeje: Njedyrbjało-li k dojednanju dóńć, hrozy klětu w měrcu chaotiski łamk z Europskej uniju.

Dotal hłownje jako „stasi-kłóda“ znate wopomnišćo Budyšin wobswětla wotnětka tež powšitkownu praksu justicy a poměry w jastwach sprjewineho města za čas nacionalsocializma. Hačrunjež je paralelne wobjednawanje wobeju diktaturow w Němskej 20. lětstotka problematiske, wone stawi­znam twarjenja historisce wotpowěduje. A njeběchu to jenož murje, kiž słužachu wšelakim politiskim systemam. Přehladka powěda předewšěm wo tym, kak spěšnje su so ludźo z wobojim aranžowali, samo, běchu-li poprawom cyle hinašeho přeswědčenja. Tuchwilu zda so zwólniwosć, rozestajeć so z časom wot 1933 do 1945, skerje snadna być. Narěči-li so prawicarski ekstremizm, runje w Sakskej ze stron knježerstwa a statneho rěčnistwa kaž z refleksa na radikalnu lěwicu pokazuja. Dokal je to wjedło, „smědźachmy“ na přikład w Kamjenicy „wobdźiwać“. Snano wopyt wopomnišća někotremužkuli woči wočini. Bosćan Nawka

Němske mišterstwa pomjatkowych atletow wotměja so jutře a sobotu w Magdeburgu. Něhdźe 25 wobdźělnikow so wubědźuje, štó móže sej w najkrótšim času najwjace słowow, wobrazow a ličbow spomjatkować. Amtěrowacy němski mišter Simon Reinhard z Mnichowa chce nowy Guinnessowy rekord nastajić: 38lětny chce spytać, sej sto cyfrow w prawym rjedźe w mjenje hač 50 sekundach spomjatkować.

Wosa w Lkw-ju je na awtodróze A 4 w Durinskej kilometry dołhe haćenje zawinowała. 30lětny šofer nakładneho awta bě spytał wosu ze swojeho jězdźidła wućěrić. Njedaloko Gery pak zhubi kontrolu nad wodźidłom a z awtom zwróći. Na A 4 dóńdźe na to k pjeć kilometrow dołhemu haćenju wobchada. Wodźer Lkw-ja bě so na zbožo jenož lochko zranił. Wosa drje je so „njezranjena“ z awta dóstała.