Jakarta (dpa/SN). Ćežke zemjerženje, kotrež je tsunami wuskutkował, je minjeny pjatk na indoneskej kupje Sulawesi wulke škody zawiniło. Znajmjeńša 832 ludźi je po dotalnych informacijach žiwjenje přisadźiło. Internetna powěsćernja Kumparan rěči samo wo 1 200 mortwych, štož pak njeje dotal oficialnje wobkrućene. Kaž pomocnicy zdźěleja, pobrachuje jim technika, zo móhli za dalšimi woporami pytać. Liča z tym, zo je tójšto ludźi pod rozwalinami zasypanych.

Přećiwo pawšalnemu rozrisanju

Berlin (dpa/SN). Předsydźa dohladowanskich radow koncernow VW, Daimler a BMW su přećiwo pawšalnej dodatnej technice za dieselowe awta. „Spřećiwjamy so rozrisanju, kotrež němskich producentow wróćo staja a dźěłowe městna wohroža“, rozłožeja Bernd Osterloh (VW), Michael Brecht (Daimler) a Manfred Schoch (BMW) w dźensnišim wudaću nowiny Bild. Unija a SPD chcetej dźensa wječor nowe poskitki wobsedźerjam dieselowych wozydłow wobzamknyć. Zaměr ­ma być, dalšim zakazam jězdźenja die­se­lowych awtow w městach zadźěwać.

Wobšěrne twarske dźěła

Skopje (dpa/SN). Wobydlerjo Makedonskeje mějachu wčera wo přichodźe swojeho małeho kraja na Balkanje rozsudźić. Hižo dlěje chce so kraj do Europskeje uniji a NATO zbližić, štož pak Grjekska hladajo na samsne mjeno sewjerneje Makedonskeje a sewjerneje prowincy Grjekskeje wotpokaza. Tak chcyše Makedonska region přemjenować. Wčerawši referendum pak je so njedosahaceho wólbneho wobdźělenja jenož 35 procentow ludźi dla bjez konkretneho wuslědka skónčił. Přiwšěm rěči šef makedonskeho knježerstwa Zoran Zajew wo wulkotnym wuspěchu, wšako je wjetšina ludźi za přemjenowanje prowincy a tak za přistup k NATO a EU hłosowała.

Wčerawši referendum njebě zawjazowacy, ale měješe poradźowansku funkciju. Doskónčnje dźě ma parlament w Skopje rozsudźić. „Wola wobydlerjow ma so nětko w politice přesadźić. Gratuluju wšitkim wobydlerjam, dokelž je demokratija dźensa dobyła“, rjekny wčera nawoda makedonskeho knježerstwa medijam.

Iniciatiwnicy a kandidaća Serbskeho sejma su so dojednali: Spočatk nowembra budźe woleny serbski sejm. Pječa jednory rozsud njebě kandidatam lochki. Wšako běchu so mnozy z nich hakle nětko sobotu w Njebjelčicach prěni raz widźeli. Tuž bě wažne a legitimne, chceš-li zhromadnje za jednu wěc dźěłać, zo so mjez sobu ze­znaješ. To wšak móhło so hižo dawno stać a nic hakle pjeć do dwanaćich. Hdyž pak je wažny termin jónu postajeny, maja so přihoty a dźěło na njón wusměrić. To so dotal njeje cyle jednorje poradźiło. Nadźijam so, zo su kandidaća kaž tež iniciatiwnicy spokojom z Njebjelčic wotjěli, dokelž su nazhonili, zo hodźa so přezjedne rozsudy tworić. A to mjez ludźimi, kotřiž so hakle krótki čas bliže znaja. To móhł dobry zakład za přichodne, snano wuspěšne a nic pod časowym ćišćom stejace dźěło w sejmje być. Jan Kral

Dokelž nochcyše na žadyn pad swój lět skomdźić, chwataše pasažěr w Dublinje za lětadłom a chcyše mašinu zastajić. Policija jeho tuž zaja. Kaž irski sćelak RTÉ zdźěli, chcyše 23lětny do Amsterdama lećeć, bě pak ze žonu přepozdźe na lětanišću. Po diskusiji z přistajenymi klepaše wón wo wokno lětanišća a chcyše durje namócnje přełamać, při čimž so magnetiski zamk wobškodźi. Randalěrar měješe so nětko před sudnistwom zamołwić. Njeje pak so ani kuska za swoje jednanje kał, ale pokaza čakacym žurnalistam před sudnistwom swój nahi zadk.

Luksuriozny bus, kotryž wužiwachu popularni hudźbnicy kaž David Guetta jako swój domicil za čas tury, stej mandźelskaj w britiskim Manchesteru kupiłoj a přetwariłoj. Wotnětka smědźa bjezdomni w nim bydlić. W tym času dóstanu woni podpěru při pytanju bydlenja.