Frankfurt n. M. (dpa/SN). Prawicarskopopulistiska strona AfD zbudźa dale wulke rozhorjenje ze swojim internetnym portalom, w kotrymž móža šulerjo politiske wuprajenja wučerjow dokumentować. „Organizowana denunciacija je srědk diktaturow“, rjekny zwjazkowa justicna ministerka Katarina Barley (SPD) nowinarjam w Frankfurće nad Mohanom. „Štóž jako strona tajke něšto zasadźa, zo by njelubych wučerjow wotkryła a zjawnje zatamał, tón zdobom pokazuje, što wo demokratiji dźerži.“
Kaž je so w Hamburgu hižo stało, chcyła AfD we wjacorych zwjazkowych krajach internetne platformy přećiwo wučerjam zarjadować, kotřiž pozdatnje kaznju neutrality njedodźerža a so kritisce wo stronje wuprajeja.
Předsyda konferency kultusowych ministrow, durinski nawoda ressorta Helmut Holter, je mjeztym připowědźił, zo so gremij na swojim dźensnišim zetkanju z naležnosću zaběra. Potrjecheni wučerjo měli so na kultusowe ministerstwo a na prawiznika wobroćić.
Drježdźany (SN/MiR). Swobodny stat Sakska płaći mnohim přistajenym wučerjam přichodnje měsačnje 170 eurow wjace. Wot lěta 2019 zaruči přiražku wšěm tym pedagogam, kotřiž su abo přińdu hač do toho do mzdoweje skupiny E 13. To zdźěli statny minister za kultus Christian Piwarz (CDU) zańdźeny pjatk nowinarjam. Dojednanje je dźěl 1,7 milliardow eurow wopřijaceho programa, z kotrymž chce swobodny stat přichodne lěta njedostatk wučerjow wotwobarać. Dźěłarnistwa maja to za krok do praweho směra. Sakska Lěwica kritizuje, zo polěkuje postupowanje CDU a SPD „z wjele pjenjezami přiběrajcy hubjenej naledźe mjez wučerjemi“.
Bjez orientacije, w cuzym kabaće a bjez swojeho Lkw-ja je šofer w Ludwigshafenje wotućił. 45lětny bě swoje nakładne awto minjenu sobotu na wulkoparkowanišću w porynsko-pfalcskim Schwegenheimje wotstajił a so w hosćencu wopił. Přichodny dźeń wón w 23 kilometrow zdalenym Ludwigshafenje wotući, bjez toho zo by wědźał, kak je do města přišoł a hdźe Lkw steji. Po wopisanju šofera, byrnjež jara njedokładnym, policija jeho Lkw namaka, tak zo móžeše wón dale jěć.
Runje hišće zadnjej sydle stej dowolnikej z Braniborskeje zwostałoj, po tym zo běchu njeznaći jeho awto na kupje Usedom pokradnyli. Wóz z wokrjesa Wódra-Sprjewja, wulki kaž transporter, steješe njedaloko přibrjoha w Heringsdorfje. Usedom je jako dowolnišćo w Berlinje a Braniborskej jara woblubowane, ale tež mjez paduchami kolesow a awtow.
Palma (dpa/SN). Při ćežkich njewjedrach a zapławjenjach je na dowolowej kupje Mallorca hač do dźensnišeho ranja znajmjeńša pjeć ludźi žiwjenje přisadźiło. To zdźěli tamniša wohnjowa wobora. Něhdźe 20 wosobow je zhubjenych, kaž španiske medije rozprawjeja. Wosebje potrjecheny bě wuchod kraja. Na widejach je widźeć, kak masy wody awta sobu storhnu. Pomocnicy wočakowachu dźensa dalše njewjedra. Z městnami nańdźe so 220 litrow dešća na kwadratny meter.
Přinoški wobmjezować
Berlin (dpa/SN). Hladajo na přiběrace kóšty při hladanju starych žadaja sej dźěłodawarjo Němskeje wot wulkeje koalicije, přinoški za socialne zawěsćenje dołhodobnje wobmjezować. Hewak móhli wone mjezu 40 procentow mzdy překročić, štož by wulke riziko za hospodarski rozrost było, rjekny prezident zwjazka dźěłodowarjow Ingo Kramer powěsćerni dpa. Pozadk je zwyšenje přinoška k hladanskemu zawěsćenju wo 0,5 procentow wot 1. januara 2019. Zwjazkowe knježerstwo chcyše to dźensa wobzamknyć.
Knižne wiki wotewrjene
Luxemburg (dpa/SN). Wustork wuhlikoweho dioksida z nowych awtow ma so po woli statow Europskeje unije hač do lěta 2030 wo 35 procentow pomjeńšić. To su wobswětowi ministrojo EU na swojim schadźowanju wčera wječor w Luxemburgu do wotpowědnych jednanjow Europskeho parlamenta wobzamknyli. Wuslědk bě na kóncu wo wjele wótriši, hač běchu sej to zwjazkowe knježerstwo a němscy awtotwarcy přeli. Předewšěm Irska, Šwedska a Danska běchu sej razniše předpisy žadali.
Komisija EU bě namjetowała, wustork wuhlikoweho dioksida přerěznje wo 30 procentow pomjeńšić, čemuž so zwjazkowe knježerstwo přizamkny. Druhe kraje žadachu sej samo 40 proc. Awstriska, kotraž EU tuchwilu nawjeduje, bě 35 proc. namjetowała. Němska je tomu na kóncu přihłosowała. Zwjazkowa ministerka za wobswět Svenja Schulze (SPD) bě do posedźenja zwurazniła, zo njeje z poziciju němskeho knježerstwa spokojom, dokelž by sej wótriše směrnicy přała. Ministrojo běchu cyły dźeń wuradźowali. Hłowny zaměr bě, zaměry EU za wobswětoškit a čisty powětr spjelnić.
Drježdźany/Berlin (dpa/SN). „Z wostróz- bjenjom“ je Drježdźanska rjemjeslniska komora wčerawši rozsud Berlinskeho zarjadniskeho sudnistwa registrowała, wjacore wotrězki němskeje stolicy za dieselowe awta zawrěć. „To trjechi tež wuchodosakske rjemjesło, wšako rjemjeslnicy z Drježdźanskeje kónčiny runje tak do potrjechenych kónčin stolicy jězdźa“, rěka w nowinskej zdźělence komory. „Sakske rjemjeslniske předewzaća maja z rozsudom jasne njelěpšiny, dokelž su w swojej mobiliće wobmjezowane.“
Techniske polěpšenja dieselowych awtow měli so zasadnje financować a bjez běrokratiskich zadźěwkow zwoprawdźić. „Hewak su sakscy rjemjeslnicy přichodne lěta w swojich hospodarskich aktiwitach masiwnje haćeni“, piše prezident komory dr. Jörg Dittrich. Berlinske zarjadnistwo bě wčera wukazało, dieselowym awtam na jědnaće nadróžnych wotrězkach w Berlinje jězdźić zakazać. Wobswětoškitna organizacija Němska přirodowa pomoc bě sej to na dobro čisćišeho powětra žadała.
Drježdźany (SN). Sakscy rjemjeslnicy su z tuchwilnym połoženjom hladajo na nadawki poprawom jara spokojom. To pak móhło so bórze změnić, tak rěka w najnowšim naprašowanju rjemjeslniskeju komorow w Choćebuzu a Drježdźanach. Po tym zhladuje 60 procentow wšitkich prašanych předewzaćow starosćiwje do přichoda. Wone boja so w zwisku z kóncom wudobywanja brunicy woteběraceje kupneje mocy ludźi, wotchada a wotwabjenja fachowcow z Łužicy kaž tež přiběraceho poćežowanja wobydlerjow a předewzaćow z dawkami a popłatkami, kaž z nowinskeje zdźělenki Drježdźanskeje rjemjeslniskeje komory wuchadźa.