Wobchadne ministerstwo chce wotrězk Drježdźany–Zhorjelc wutwarić

Budyšin/Berlin (CS/SN/MkWj). Po wčerawšim rozsudźe zwjazkoweho ministerstwa za wobchad nastupajo elektrifi­kaciju železniskeje čary mjez Drježdźanami a Zhorjelcom je serbski zapósłanc CDU w Sakskim krajnym sejmje Marko Šiman optimistiski, zo so planowany elektriski wutwar čary zwoprawdźi. To je na naprašowanje Serbskich Nowin hišće raz potwjerdźił. Wobchadne ministerstwo bě zdźěliło, zo chcedźa dwaj sakskej wobchadnej projektaj na lisćinu najwažnišich předewzaćow zapisać, štož faktisce rěka, zo je financowanje předewzaćow zaručene. Při tym jedna so wo nowu železnisku čaru mjez Drježdźanami a Prahu po Rudnych horinach ze 26 kilometrow dołhim tunlom a wo elektrifikaciju železniskeje čary mjez Lipskom a Kamjenicu. Jeničce za nowu čaru do Prahi chcedźa na němskim boku 1,5 miliardow eurow nałožić. Železniski wotrězk Drježdźany–Zhorjelc njebě spočatnje w tym zwisku naspomnjeny. Pozdźišo wšak rěkaše, zo ma so jeho elektrifikacija čary z wosebiteho fondsa zapłaćić.

Reakcije na wčerawše wozjewjenje ze zwjazkoweho ministerstwa za wobchad a digitalnu infrastrukturu běchu samsne: Je zahubne, zo njejsu tam elektrifikaciju železniskeju čarow Drježdźany–Zhorjelc–pólska hranica a Choćebuz–Zhorjelc jako prioritnej zarjadowałoj. Spěšnje bě rěč wo zanjechanju Łužicy. Dospołny, w interneće wozjewjeny dokument ministerstwa „Pohódnoćenje předewzaćow za wutwar železniskich čarow potencielneje potrjeby“ pak wopřiješe w zadnim dźělu za Łužicu tež pozitiwnu powěsć. Mjenowanej čarje stej tam namjetowanej za wosebity program elektrifikacije, předewzaća z koaliciskeho zrěčenja unije a SPD. Wo nim chce etatowy wuběrk zwjazkoweho sejma hižo jutře rozsudźić. W Berlinje njejsu potajkim dospołnje na Łužicu zabyli. Wobě łužiskej čarje pomhatej dźěry we wobstejacej elektrifikaciji železnicy přewinyć. Tak su šansy dobre, zo wurosćetej z dweju namjetow krutej projektaj. Dokumenty hač do kónca čitać so tuž wudani. Axel Arlt

Pokiwy za wobchadźenje z němskimi turistami je nižozemski turistiski zwjazk w pomjeznej kónčinje Drenthe wudał. Tak poručeja, Němcow tež němsce narěčeć. Nižozemski akcent wopytowarjo ze susodneho kraja rady słyša. Dalši pokiw: Němcy njelubuja překwapjenja. Woni chcedźa do skazaneje stwy zaćahnyć a do žaneje druheje. Rady maja němscy hosćo informacije wo stawiznach kaž tež wo kraju a ludźoch. Wulku wažnosć kładu woni na wěstotu, dowěru a profesionalnosć, w směrnicach dale rěka.

Pozdatnje wotrězanej porstaj je 15lětny w durinskim Sonnebergu w parkowanskim domje namakał a policiju informował. Jako zastojnicy přijědźechu, nje­móžachu žanej tajkej porstaj namakać, město toho pak wotkusnjenej želejowej bananje. Tej bě młodźenc mylnje za wotrězanej porstaj měł.

Berlin/Drježdźany (SN/at). Do dźěłoweje skupiny zwjazkoweho knježerstwa, kotraž ma namjety za reformu restriktiwneho zakonja wo změnje mjeńšinowych mjenow zdźěłać, su nimo zastupjerjow přisłušneju zwjazkoweju ministerstwow nutřkowneho a justicy štyrjoch profe­sorow uniwersitow Mnichow, Marburg, Düsseldorf a Regensburg kaž tež po jednym zastupjerju Zwjazkoweho sudnistwa a zarjadniskeho sudnistwa Mannheim a nimo toho nawodu Augsburgskeho stawnistwa powołali. To wotmołwi prof. dr. Günter Krings ze zwjazkoweho ministerstwa nutřkowneho na małe naprašowanje sakskeho zapósłanca FDP Torstena Herbsta.