W Braniborskej hotuja so na dospołnje nowu koaliciju SPD a BSW

Podstupim (dpa/SN). Prócowanja braniborskeje SPD a BSW wo zhromadne knježerstwo steja tutón tydźeń před rozsudnymi wuhibkami. Krajnej zjězdaj wobeju stronow rozsudźitej přichodny pjatk wo koaliciskim zrěčenju. Hižo jutře zeńdźe so krajny sejm k wurjadnemu posedźenju. Při tym póńdźe wosebje wo plany SPD a BSW nastupajo podlěšenje dotalneho rjadowanja, po kotrymž staršich ze snadnymi dochodami při popłatkach za pěstowarnje podpěruja. Tola tež frakcija AfD chce wjacore próstwy zapodać. Tohodla budźe plenarne posedźenje tež test za planowane čerwjeno-fijałkojtu koaliciju, kotraž by w Němskej dotal jónkrótna była.

Krajne předsydstwo SPD bě hižo minjeny pjatk jasny signal wusyłał a koali­ciske zrěčenje jednohłósnje schwalił. Krajne předsydstwo BSW chcyše dźensa wo tym rozsudźić.

Bjarnat Cyž je na zwjazkowym předsydstwje rjekł, zo by wjac pozitiwnych powěsćow z medijow zhonić chcył. Tuž z pozitiwnym započinam: Je wjele swójbow, kiž swojim dźěćom a wnučkam serbšćinu cyle samozrozumliwje sposrědkuja – ju wšědnje doma rěčo. Tutu rěčnu „substancu“ su strategojo modela 2plus hižo před 20 lětami jako podpěru njeserbowacym dźěćom w šuli zaplanowali. A tam, hdźež su ludźo wot 1950tych lět w swójbje serbować přestali, su sobudźěłaćerjo z rěčneje kupy „katolskeho třiróžka“ jara witani, zo bychu rěč w přeněmčenych kónčinach rewitalizowali. Warnowanje na zwjazkowym předsydstwje, zo njesměmy rěčne połoženje w katolskej kónčinje „romantizować“, je woprawnjene. Hižo na hłownej zhromadźiznje župy „Michał Hórnik“ su sej ludźo žadali podpěru za zwyšenje rěčneho niwowa tež w katolskej kónčinje. My wšitcy dźě so ze „substancy“ katolskeje kupy za cyły lud posłužujemy. Tež redakcija Serbskich Nowin. Marcel Brauman

Na pjasćowanskim turněrje do so bili su wopytowarjo w Schwerinje. Přiwisnicy wjacorych pjasćowanskich klubow z Kiela, Hamburga a Schwerina běchu so do włosow dóstali, dokelž njeběchu z rozsudom sudnikow přezjedni, policija zdźěla. Rozestajenja běchu spočatnje werbalne a skónčnje namócnje wuwjercholichu. Na bijeńcy wobdźěli so tójšto ludźi.

Awstralski zakoń wo socialnych medijach by wjetšina ludźi w Němskej witała. 77 procentow wšěch woprašanych je za to, dźěćom a młodostnym pod 16 lětami přistup k socialnym medijam zakazać. Jenož 13 procentow tajke rjadowanje wotpokazuje. Awstralska chce z nowym zakonjom dźěći a młodostnych před škódnymi wuskutkami škitać, kotrež wužiwanje internetnych medijow ze sobu přinjese. Tež w Němskej je sej wjetšina wěsta, zo socialne medije dźěćom zeškodźa.

Pančicy-Kukow (SN/MkWj). Chětro přewidny bě zajim wobydlerjow w Pančicach-Kukowje za wobydlersku rozmołwu, na kotruž bě krajny rada Budyskeho wokrjesa Udo Witschas (CDU) wčera wječor přeprosył. Runje šěsć ludźi bě do awle zakładneje šule přichwatało.

Wo wjele wjace ludźi sedźeše jim napřećo: Krajny rada bě wjacorych wotrjadnikow sobu přiwjezł. Mjez nimi běchu prěni přirjadowany Jörg Szewczyk, dalša přirjadowana dr. Romy Reinisch a decernentka Kristin Penther. Gmejny zarjadniskeho zwjazka zastupowachu jeje předsyda Stefan Anders a wjesnjanosća Marko Kliman, André Bulank, Markus Kreuz, a Clemens Poldrack.

Krajna rada potwjerdźi, zo ma najebać snadny zajim tajke wobydlerske rozmołwy za wažne a zo chcył tutón format tež z předewzaćelemi regiona nałožować.