Dom bórze wosamoćeny?
Mějićel Sprjewineho hotela Peter Rausch Budyšin na přeco wopušći
Budyšin (SN/mwe). Financny wuběrk Budyšina je na swojim posedźenju dźens tydźenja přilubjenu sumu 25 000 eurow za sobufinancowanje integraciskeho centruma w Budyskim Sprjewinym hotelu cofnył. Kaž we wozjewjenju města rěka, je pozadk toho, zo bě wotnajenske zrěčenje mjez wobhospodarjenskej towaršnosću a krajnoradnym zarjadom Budyšina jako zaměstnjenskim zarjadnistwom k 30. junijej wuběžało. „W přezjednosći ze sakskej statnej kencliju, Budyskim wokrjesom kaž tež Budyskim wyšim měšćanostu Alexanderom Ahrensom (SPD) wupraji so wobhospodarjenska towaršnosć zwólniwa, zarjadnišćo hač do kónca lěta dale wobhospodarjeć“, rěka we wozjewjenju města. 28 tuchwilu tam zaměstnjenym ćěkancam z připóznatym statusom přebywanja w Němskej chcedźa nětko bydlenja w měsće a wokolinje sposrědkować a jich do wšědneho žiwjenja pola nas integrować.
To a tamne (14.11.17)
W sakskich ministerstwach njeje pohibowanje na kolesu wšudźe „in“, kaž ličby pokazuja. Přerěznje 174 přistajenych zjawneje słužby swobodneho stata dźěli sej jedne koleso. Hospodarske ministerstwo, kotrež je za kolesowanski wobchad zamołwite, ma jeničce tři kolesa. W sakskim krajnym zarjedźe za wobswět, ratarstwo a geologiju porno tomu maja 77 kolesow za słužbne jězby.
Husyca w Mannheimje njeměješe drje wulki lóšt so na tradicionalnym jědźenju husycy na swjedźenju swjateho Měrćina wobdźělić. Gigotajo bě so wona 11. nowembra na terasy jednoho Mannheimskeho bydlenja schowała. Po informacijach policije drje nochcyše so cyle jednorje druhdźe schować. Za pomocu pytajo bě wobydlerka tuž zastojnikow wołała. Tola tež woni w husycy po zdaću žadyn zaćišć njezawostajichu. Dokelž njeje so huso z blaka hibało, dósta wone tam „nachwilny zwěrjeći azyl“.
Nowy muzej tachantstwa
Magdeburg (B/SN) Pózdnju nazymu 2018 wotewru w Magdeburgu muzej tachantstwa Ottonianum. W nim powědaja wo stawiznach kejžora Otta Wulkeho (zemr. 973), kralowny Edithy (zemr. 946), arcybiskopstwa Magdeburg a wo tachantstwje. Na kulinariju 25. oktobra předstaji so w 19.30 hodź. w domje Roncalli Claus-Peter Hesse jako projektny nawoda tachantskeho muzeja Ottonianum při kulturnohistoriskim muzeju Magdeburg.
Ewangelska cyrkej spokojom
Berlin (B/SN). Ewangelska krajna cyrkej Berlin-Braniborska-Šleska Hornja Łužica je z jubilejom k reformaciji jara spokojom. Mnohe zarjadowanja skićachu móžnosć, z nabožnymi, kulturnymi a politiskimi wuskutkami reformacije so rozestajeć. W zdźělence rěka, zo je so poradźiło, poselstwo reformacije towaršnosći znowa wuwědomjeć. „Swoboda w zmysle Luthera měni, zo wěra do Boha nas wuswobodźa, a wšitcy ludźo zhromadnje zamołwitosć za to njesu, zo smy w towaršnosći zhromadnje žiwi.“ Biskop Markus Dröge wuzběhny.
Staw ćěkancow je katastrofa
Turkowska woporam pomha
Istanbul. Po ćežkich zemjerženjach w pomjeznym regionje mjez Iranom a sewjernym Irakom Turkowska woporam w katastrofowym regionje nětko pomha. Kaž turkowski ministerski prezident Binali Yıldırım dźensa po informacijach statneje powěsćoweje agentury Anadolu zdźěli, je prěni pomocny konwoj ze zežiwidłami a medikamentami po puću. Zemjerženje ze sylnosću 7,3 bě wčera wječor region střasło. Byrnjež wotležane kónčiny w horinach jenož mało wobsydlene byli, zličichu dotal wjace hač 200 smjertnych woporow a 1 700 zranjenych.
Steinmeier w Sakskej
Oberwiesenthal. Zwjazkowy prezident Frank-Walter Steinmeier je dźensa najwyši dypk Sakskeje wopytał. Na Šmrěčniku w Rudnych horinach rozmołwješe so wón z krajnymi radami. Jutřiši zaměr jeho jězby su Drježdźany. Tam wobdźěli so na posedźenju sakskeho knježerstwa a na zarjadowanju krajneje centrale za politiske kubłanje na temu demokratija. Wopyt centruma za regeneratiwne terapije wizitu Steinmeiera skulojći.
Pahor wospjet wuzwoleny
W Choćebuskim měšćanskim muzeju witaja wot soboty na wustajeńcu ...
Nowu dźěłowu skupinu załožili
Rom (SN). Tak mjenowana Non-Kinstate- dźěłowa skupina Federalistiskeje unije europskich narodnych mjeńšin (FUEN) je so zašły tydźeń w Romje konstituowała. Załožić tajku dźěłowu skupinu bě dołhodobny zaměr wjacorych sobustawskich organizacijow FUEN. „Mjeńšiny, kiž nimaja maćerny kraj, su rěčne skupiny, kotrež trjebaja najwjac pomocy, zo móhli swoju kulturu a rěč přichodnym generacijam dale dać“, prezident FUEN Loránt Vincze w swojej narěči wuzběhny.
Puć dojednanja dale wobćežny
Berlin (dpa/SN). Drje posledni sonděrowanski tydźeń za jamaisku koaliciju zahaja so ze signalemi kompromisow. Dźěłowa skupina „nutřkowne, wěstota, prawniski stat“ je so dojednała zhromadny centrum za wotwobaranje terora Zwjazka a krajow (GTAZ) reformować. Delegacija CDU pokaza so zwólniwa, při přićahu swójbow ćěkancow Zelenym napřećo hić. Dojednali su so jednacy wo tym, Zwjazkowy kriminalny zarjad a wustawoškit při wotwobaranju terora sylnišo koordinować. Njepřezjedni pak su sej nastupajo kontrolu tajnych słužbow. FDP a Zeleni chcedźa je bóle zesylnić hač unija.
Jednaćelka frakcije Zelenych Kathrin Göring-Eckardt ma jamaiske jednanja za ekstremnje wobćežne. Po sydomhodźinskich wuradźowanjach wčera wječor wona rjekny, zo su strony w mnohich dypkach hišće daloko wot so zdalene. Zańdźeny tydźeń je so přemało hibało. Po infomacijach korespondentow dojednachu so stronscy předsydźa na to, zwostawace jednanske koła sčinić za wěc šefow.
To a tamne (13.11.17)
Wjace hač 400 lět stary templ w japanskej stolicy ma dinosawrija za stražowarja. Nimale dwaj metraj wysoka statuwa steji pódla hale w lěće 1600 załoženeho templa Shoganji. Skurilnu ideju měješe prěni duchowny Ryo Kasuga. Wón chce templ sčinić kóždemu zajimawy a wučby buddhizma šěrić. Zdobom wabi templ z planetarijom. Tež duchowni druhdźe wabja za swoje temple. Tak jedyn z nich rappuje, dalši wobhospodarja baru.
W Strasbourgu nimaja lětsa zbožo z hodownym štomom. Prěnja jědla bě so při podrězanju rozłamała. Druha steješe jenož někotre dny na centralnej městnosći Place Kléber, doniž njezwěsćichu 15 centimetrow dołhu škałobu w zdónku. Měšćanosta hodowneje stolicy – kaž so elsaske město rady mjenuje – z wěstotnych přičin rozsudźi štom podrězać. Jědlu čisło tři su mjeztym stajili.
Cyłe łónco konkretnych naprawow za škit mjeńšin
Předsydka rady Załožby za serbski lud Susann Šenkec hižo wjacore lěta we wobłuku Federalistiskeje unije europskich narodnych mjeńšin (FUEN) na europskej politiskej runinje sobu skutkuje. Wona je mjez druhim wobydlersku iniciatiwu FUEN Minority SafePack sobu załožiła. Serbske Nowiny su so z njej wo iniciatiwje rozmołwjeli.
Sće iniciatiwu hižo podpisała?
S. Šenkec: Wězo, sym dźě ze swojim skutkowanjom w FUEN iniciatiwu takrjec sobu zmóžniła. Jako třeća sym online podpisała, wědźo, kelko podpismow je hač k milionej hišće trěbnych.
Serbja w Němskej maja porno druhim mjeńšinam w Europje hižo dosć dobry mjeńšinowy škit. Čehodla měli woni wobydlersku iniciatiwu FUEN podpěrać?
Poměr Ruskeje k Europje
Hamburg (dpa/SN). Konflikt na Ukrainje a aneksija połkupy Krim stej poměr mjez Ruskej a Europu masiwnje pohubjeńšiłoj. Po reprezentatiwnym naprašowanju w nadawku Kölnskeje Körber-załožby je 44 procentow Rusow, 41 procentow Němcow a 38 procentow Polakow měnjenja, zo njesłuša Ruska do Europy. Jenož 49 procentow z naprašowanych Rusow měnjachu, zo Ruska do Europy słuša. Tež 56 procentow Němcow a 57 procentow Polakow widźa Rusku w Europje.
Zetkanje so njewotměje
Da Nang (dpa/SN). Na tuchwilu so wotměwacym Azisko-Pacifiskim-wjeršku we Vietnamje nima porno dotalnym wočakowanjam k zetkanju mjez ameriskim prezidentom Donaldom Trumpom a jeho kolegu, ruskim prezidentom Wladimirom Putinom dóńć. Rěčnica Donalda Trumpa Sarah Sanders wobkrući to dźensa z terminowymi problemami. Prezidentaj zetkataj so na kromje zeńdźenja při witanju k wšelkim rozmołwam.
Za pjenjezy na swobodu
