Běła Woda (AK/SN). Prawniski dohlad Zhorjelskeho wokrjesa je wobě spřećiwjeni wuslědka wólbow wyšeho měšćanosty Běłeje Wody wotpokazał, kaž nowinska rěčnica Zhorjelskeho krajnoradneho zarjada Susanne Lehmann informuje. Zarjad bě hižo 27. oktobra rozsudźił. Wuslědkej běštaj kandidat Rico Jung (njestronjan) a wólbokmana Yvonne Kick znapřećiwiłoj. Wólby 24. septembra skónčichu so z chětro wuskim wotstawkom. Dotalny wyši měšćanosta wostanje Torsten Pötzsch (Klartext), kiž dósta 4 894 hłosow wolerjow. Za Junga bě so 4 661 ludźi wuprajiło.
Brüssel/Madrid (dpa/SN). Bywšeho šefa katalanskeho regionalneho knježerstwa Carlesa Puigdemonta su dźensa w nocy na swobodu pušćili. Politikar a dalši štyrjo ministrojo separatistiskeho knježerstwa běchu so wčera w Brüsselu pola policije přizjewili, hdźež jich přesłyšowachu. Kaž belgiski přepytowanski sudnik postaji, njesmědźa woni pod wotpowědnymi wuměnjenjemi kraj wopušćić. Wo dalšim postupowanju budźe w přichodnych 15 dnjach rozsudźene. Po prawach EU ma Belgiska 60 dnjow chwile wo tym rozsudźić, hač Puigdemonta a ministrow Španiskej přepoda. Minjeny pjatk bě Madridske statne sudnistwo mjezynarodny wukaz zajeća postajiło. Čłonam katalanskeho knježerstwa wumjetuja rebeliju.
Separatisća w Španiskej rozsud Brüsselskich zarjadow witaja. Rěčnik wotsadźeneho zwjazka Junts pel Si (Zhromadnje za Haj) Roger Torrent zdźěli: „To je rozsud mjez woprawdźitym rozdźělenjom mocy a politiskim justicnym systemom, mjez zrałej demokratiju a zwrěšćenym prawniskim statom.“
Tenggarong (SN). Mjezynarodny folklorny festiwal „Łužica/Lausitz“ je nětko jako CIOFF-festiwal připóznaty. To mjez druhim woznamjenja, zo spjelnja najwyše kwalitatiwne kriterije. Tuchwilu z něhdźe 380 festiwalow, kotrež su w festiwalnej protyce na lěto naličene, něhdźe třećina kriterijam wotpowěduje. To je jedyn wuslědk wuradźowanjow lětušeho 47. kongresa Mjezynarodneje rady za organizaciju folklornych festiwalow a ludoweje kultury (CIOFF) w indoneskim Tenggarongu, informuje jednaćel Domowiny Marko Kowar w nowinskej zdźělence. 113 čłonow, mjez nimi w delegaciji Němskeje Marko Kowar, je so w oktobru na nim wobdźěliło. Wobdźělnicy, mjez nimi 49 porjadnych čłonow a dalšich něhdźe dźesać asociěrowanych a korespondowacych čłonow, wuradźowachu wosebje wo nowej strategiji swětoweje organizacije. 89 procentow přitomnych přihłosowaše nowym měritkam „wotewrjene, demokratiske, reprezentatiwne a komunikatiwne“.
W zachodźe domskeho parkował je 82lětny w Badensko-Württembergskej. Poprawom chcyše wróćo do swojeje garaže jěć, trjechił pak je napřećo ležace schodźišćo wjaceswójbneho domu. Wuměnkar bě spinadło a płunowy pedal zaměnił, a tak steješe skónčnje mjez sćěnomaj we wochěži susodow.
Mylnje na Wšěch swjatych w poprawom zawrjenej kupnicy w Stuttgarće nakupować chcyštaj mužej w starobje 28 a 42 lět. Po wšěm zdaću njejstaj na swjaty dźeń mysliłoj. Njewotwisnje jedyn wot tamneho dóstaštaj so wobaj přez defektne zachodne durje do kupnicy a hakle při kasy pytnyštaj, zo we wobchodźe scyła žanoho personala njebě. Jako alarm zaskoči, zawołaštaj policiju. Tež zastojnicy zwěsćichu defekt durjow. Mužej wšak dyrbještaj twory zaso do polcow zestajeć a kupnicu z prózdnej tobołu wopušćić.
Prezident Federalistiskeje unije europskich narodnych mjeńšin (FUEN) Loránt Vincze je wobydlersku iniciatiwu Minority SafePack sobu do žiwjenja zwołał. Serbske Nowiny su so z nim wo iniciatiwje rozmołwjeli.
Sće iniciatiwu hižo podpisał?
L. Vincze: Mjez iniciatorami a jako prezident FUEN běch jedyn z prěnich podpisarjow. To bě w meji na kongresu FUEN w Cluju-Napoce, hdźež smy kampanju oficialnje zahajili. Běch zdobom prěni, kiž je iniciatiwu online podpisał.
Serbja w Němskej maja porno druhim mjeńšinam w Europje hižo dosć dobry mjeńšinowy škit. Čehodla měli woni wobydlersku iniciatiwu FUEN podpěrać?
Drježdźany/Kamjenica (dpa/SN). Do jutřišeho stronskeho zjězda sakskeje Lěwicy w Kamjenicy je jasne, zo wojujetaj dwaj kandidataj wo zastojnstwo předsydy. Nimo krajneje jednaćelki Antje Feiks je tež parlamentarnik André Schollbach ambicije přizjewił. Tuchwilny šef Lěwicy Rico Gebhardt, kiž bě Feiks jako swoju naslědnicu namjetował, ma nowy namjet za wosobinski nadběh na sebje. Hdyž Feliks jutře podleži, chce wón prašenje dowěry jako frakciski předsyda w krajnym sejmje stajić.
Trump poda so do Aziskeje
Washington (dpa/SN). Krótko do jězby prezidenta USA Donalda Trumpa do Aziskeje w Americe wotwažuja, hač měli Sewjernu Koreju zaso na lisćinu krajow přiwzać, kotrež teror podpěruja. To móhł dźěl strategije USA być, wojować přećiwo atomowemu programej komunistiskeho kraja. Korejska kriza je ćežišćo Trumpoweje jězby, na kotruž so dźensa poda. Tuchwilu steja na lisćinje terora Iran, Sudan, Syriska a Kuba. Sewjernu Koreju běchu lěta 2008 z lisćiny šmórnyli.
Premjera za měšćanostu