29 mortwych w mošeji
Kabul (dpa/K/SN). Sebjemordarski atentat na mošeju w zapadoafghaniskim měsće Herat je sej znajmjeńša 29 mortwych žadał. 63 ludźi bu zranjenych. Ličba woporow móhła so hišće powjetšić. Sćelak Tolo TV rozprawja, zo jedna so wo šiitisku mošeju. Štó je njeskutk wuwjedł, njeje dotal wěste. Bojownicy sunnitiskeje teroristiskeje milicy Islamski stat su w minjenym času wosebje w stolicy Kabulu šiitiske mošeje a zhromadźizny šiitiskeje mjeńšiny nadpadowali.
Nowy šef FBI wobkrućeny
Washington (dpa/SN). Jurist Christopher Wray je nowy nawoda FBI, zwjazkoweje policije USA. Senat je jeho pomjenowanje wčera wječor wobkrućił. Wray naslěduje Jamesa Comeyja, kotrehož bě prezident Donald Trump njewočakowano wotsadźił. Kaž Wray připowědźi, chcył wón zastojnstwo njewotwisnje wukonjeć a sej kóžde politiske wobwliwowanje zakazać. 50lětny dźěłaše naposledk jako prawiznik we Washingtonje.
UNO namołwja k dialogej
„Waš nakupowanski wóz je prózdny“ steješe dźensa na ...
Italska zasadźi nětko wojakow
Wjeršk přepołožili
Berlin (dpa/SN). Tak mjenowany dieselowy wjeršk Zwjazka, krajow a awtotwarcow Němskeje su dźensa na druhe městno přepołožili. Zetkanje njewotmě so, kaž předwidźane, we wobchadnym ministerstwje, ale z wěstotnych přičin w bliskim nutřkownym ministerstwje, kaž dźensa rano zdźělichu. Před wobchadnym ministerstwom, kotrež leži při wjele wužiwanej hłownej dróze, ludźo wot ranja protestowachu. Aktiwisća wobswětoškitneje organizacije Greenpeace běchu na twarjenje ministerstwa zalězli a transparent přećiwo škódnym dusykowym oksidam připrawili, kotrež wosebje dieselowe awta zawinuja.
Wobdźělnicy zetkanja chcychu wuradźować, kak móhli wustork z dusykowych oksidow pomjeńšić. Wo wuslědkach hač do kónca redakciskeho časa žane informacije njepředležachu.
Druha stronka medalje
Socialne wudawki přiběraja
Najebać dobre połoženje na dźěłowych wikach dyrbi stat připłaćić
Berlin (dpa/SN). Němska je loni najebać dobre połoženje na dźěłowych wikach 918 miliardow eurow za socialne naležnosće wudała. Tole wuchadźa ze Socialneje rozprawy 2017 ministerki Andreje Nahles (SPD), kotruž je zwjazkowe knježerstwo dźensa schwaliło.
Socialne wudawki su porno lětu 2015 wo 3,7 procentow přiběrali. Wone wučinjeja mjeztym 29,3 procenty nutřkokrajneho bruttoprodukta. Po wobličenjach fachowcow móhli hač do kónca přichodneje legislaturneje doby hranicu biliona eurow překročić. Tele wudawki su trěbne, zo by towaršnosć socialne njesprawnosće wurunała. Z pjenjezami podpěruje stat na přikład swójby z dźěćimi, zbrašenych, rentnarjow abo hladanja potrěbnych.
Tragiske splećenje
To a tamne (02.08.17)
Z wětřikom wotnjeseny narodninski dar k 70ćinam je muž w Sakskej tola hišće dóstał. Policija je jemu wjacore z cyłkownje 550 eurami pjelnjene powětrowe balony wróćiła. Te bě muž ze Stollberga wot swojich dźowkow dóstał. Z heliumom pjelnjene balony pak přez wotewrjene terasowe durje twochnychu a po 150 kilometrach na kolesowanskej šćežce pola Polenza přizemichu. Tam je 14lětna namaka a policiji woteda.
Zastup do hosćenca wotpokazać chcychu sydom britiskim duchownym w Cardiffje, dokelž mějachu jich za wobdźělnikow fety k zakónčenju nježenjenosće. „Sorry, pola nas njejsu ani předrasćenja ani tajke fety dowolene“, rjekny jim stražnik při durjach. W poslednim wokomiku so manager hosćenca duchownych dohlada a prošeše jich nutř. Z darmotnym piwom bě problem ze swěta.
Wjace mortwych ciwilistow
Kabul (B/SN). W Afghanistanje su prěnje połlěto 2017 po zdźělenju UNO, Wysokeho komisariata za čłowjeske prawa, 1 662 ciwilistow, dwaj procentaj wjace hač loni w samsnym času, morili. Přiběrała je ličba morjenych a zranjenych žonow a dźěći. 174 žónskich su morili a 462 zranili, to je přiróst wo 23 procentow. 436 dźěći je zahinyło, štož je dźewjeć procentow wjace, a 1 141 mjeńšich dźěći bu zranjenych. Byrnjež UNO za swoju rozprawu dosć dokładnje rešeršowała, móhła woprawdźita ličba woporow a ranjenych hišće wjetša być.
Afghaniskich ćěkancow škitać
Drježdźany (B/SN). Caritas biskopstwa Drježdźany-Mišno namołwja sakske krajne knježerstwo, ze swobodneho stata najprjedy jónu žanych ćěkancow do Afghanistana njewotsunyć. Tam su woni w najwjetšim straše, dokelž so połoženje wěstoty w Afghanistanje dale pohubjeńša, wuzběhny direktor Carity Mathias Mitzscherlich. Wěstota nawrótnikow njeje zaručena. Tole wobkrućeja tež pomocnicy Carity international. W žanym druhim kraju njeje telko terorowych nadpadow kaž w Afghanistanje.
Krej na rownym płatnje
Wopak komunikował?
Washington (dpa/K/SN). Po dźesać dnjach skutkowanja jako komunikaciski šef prezidenta Donalda Trumpa dyrbi Anthony Scaramucci zaso hić. Trump chce nowemu šefej staba Johnej Kellyjej njepoćeženy start zmóžnić, rěka k tomu z Běłeho domu. Ameriske medije porno tomu rozprawjeja, zo je sej Kelly žadał šefa komunikacije pušćić. Tón bě za krótki čas swojeje słužby hłownje negatiwnje napadnył, wužiwajo wulgarizmy a ranjo druhich sobudźěłaćerjow.
Dobrindt: Dobre partnerstwo
Berlin (dpa/SN). Do napjeće wočakowaneho dieseloweho wjerška mjez politiku a zastupnikami němskich awtotwarcow wotpokazuje zwjazkowy wobchadny minister Alexander Dobrindt (CSU) wumjetowanja, zo je z awtomobilowej branšu přewusko splećeny. „Za kumpanstwo njejsym k dispoziciji“, rjekny minister w telewiziji ARD. Styki k awtotwarcam su „dobre partnerstwo, kotrež je zakład socialneho wičneho hospodarstwa“.
Z pledoajejom pokročowali
