To a tamne (30.06.17)
Psyči problem měješe Mnichowska wohnjowa wobora wčera rozrisać: Pos bě w lifće zawrjeny, jeho wobsedźerjo pak steještaj před nim. Prawdźepodobnje bě so psyči powjaz w durjach zapopadnył, tak zo so hižo njewotewrěchu. Tež sobudźěłaćer klučoweje słužby njemóžeše pomhać. Hakle powołanska wohnjowa wobora blokowane durje skónčnje wočini a Jack Russella wuswobodźi.
Hdyž sy alkohol pił, da awto radšo stejo wostaj. Tole je mužomaj w starobje 26 a 27 lět na awtodróze do mysli přišło. Tak zastaštaj na nuzowej čarje na A 29 pola Cloppenburga a lehnyštaj so spać. Zastojnikaj awtodróhoweje policije dyrbještaj chětro raznje klepać, zo byštaj jeju wubudźiłoj. Test alkohola wunjese 2,3 a 2,8 promilow. Jedyn tamneho winowaše, zo je jěł. Policisća dachu awto ze strašneho parkowanskeho městna wotwlec.
Wo Erdoğana njerodźa
Moskwa (dpa/K/SN). Zwjazkowe knježerstwo chce planowanu narěč turkowskeho prezidenta Recepa Tayyipa Erdoğana na kromje wjerška G 20 w Němskej zakazać. To je zwjazkowy wonkowny minister Sigmar Gabriel (SPD) dźensa w Moskwje připowědźił. „Zdźělimy Turkowskej, zo tajki wustup w Němskej móžny njeje“, wón rjekny. Pozicija je ze zwjazkowej kanclerku Merkel (CDU) dorěčana. Erdoğan bě oficialnje próstwu podał, směć w Němskej k swojim krajanam porěčeć.
Kardinal zastojnstwo złožił
Sydney/Rom (dpa/SN). Jedyn z najwyšich rjadnych kardinalow Vatikana, za financy zamołwity George Pell, je hladajo na wumjetowanja znjewužiwanja dźěći w swojej awstralskej domiznje dla zastojnstwo nachwilnje złožił. Bamž Franciskus je tole Pellej dowolił, zo móhł w Awstralskej swoju njewinowatosć dopokazać, kaž dźensa rěkaše. W Awstralskej běchu njedawno přećiwo 76lětnemu přepytować započeli. Pell dyrbi 18. julija na sudnistwje w Melbournje wuprajić.
Italska žada sej wjace pomocy
Wjace wojakowdo Afghanistana
Wočakuje jasny signal
To a tamne (29.06.17)
Njesebičny mandźelski je njezbožu swojeje žony zadźěwał. Na kolesowanskim wulěće blisko bayerskeho Oberstdorfa 50lětna mandźelska měnješe, zo borzdźidła e-bika njefunguja. Na to muž z kolesa skoči a so jej před e-bike ćisny, zo njeby wona do bliskeho płota prasnyła. Wobaj so snadnje zraništaj. Při kontroli elektrokolesa wšak dyrbještaj zwěsćić: Borzdźidła běchu bjezporočne.
Kuriozny pad měješe Drježdźanska wohnjowa wobora wčera zmištrować. Muž bě sej kolesowy zamk wokoło bjedrow přizamknył. Jako chcyše jón zaso wotamknyć, so klučik wotłama. Poda so tuž po najspěšnišim puću na wohnjowobornu stražu w měšćanskim dźělu Albertstadt, hdźež prošeše wo pomoc. Kameradojo rady pomhachu a zamk přetřihachu.
Serbskej přehladce w Podstupimje
Turkojo w Němskej čušla
Berlin (dpa/K/SN). Turkowska tajna słužba hromadźi tuchwilu w zesylnjenej měrje informacije wo němskich politikarjach. We wóčku ma po zwěsćenju nowiny Welt wjacorych ekspertow zwjazkoweho sejma za nutřkownu, wonkownu a zakitowansku politiku. Zwjazkowy kriminalny zarjad je z někotrymi zapósłancami tohodla tak mjenowane wěstotne rozmołwy wjedł. Zwjazkowe statne rěčnistwo nětko w naležnosći ze swojeje strony přepytuje.
Dalši cyberowy nadpad
Berlin (dpa/K/SN). Šěsć njedźel po globalnej atace wudrěwanskeho trojanera „WannaCry“ lemi dalši cyberowy nadpad předewzaća a zarjady. Potrjechene su mjez druhimi cyrobiznowy hober Mondelez („Milka“), ruski naftowy koncern Rusneft, danska łódźnica Maersk a wulkoreklamownja WPP. Ruska firma za IT-wěstotu Kaspersky je wčera něhdźe 2 000 atakow registrowała, zwjetša w Ruskej a Ukrainje, ale tež w Němskej, Pólskej, Italskej, USA a druhdźe.
Etat 2018 schwaleny
Policisća su dźensa konferencnišćo wjerška G 20 w Hamburgu z ...
W koalicijihrozy konfrontacija
Berlin (dpa/SN). Zwjazkowy sejm prawdźepodobnje hižo zajutřišim, pjatk, wo mandźelstwje za wšitkich rozsudźi, přećiwo woli CDU/CSU. SPD, Lěwica a Zeleni su dźensa w prawniskim wuběrku zwjazkoweho sejma ze swojimi hłosami přesadźili, zo tema krótkodobnje na dnjowy porjad parlamenta přińdźe, kaž čłonojo wuběrka zdźělichu. Tajki čerwjeno-čerwjeno-zeleny wotum je kedźbyhódny podawk, dokelž je zdobom wotewrjena konfrontacija mjez SPD a CDU/CSU. Unija bě so přećiwo tajkemu wothłosowanju hišće do wólbow zwjazkoweho sejma wuprajiła. Zwjazkowa kanclerka Angela Merkel (CDU) bě póndźelu swoje dotalne jasne „ně“ k mandźelstwu homoseksualnych złahodniła a tak chcyjo nochcyjo debatu wo tym nastorčiła.
Gabriel třeći raz w Ruskej
Krasnodar (dpa/K/SN). Němski wonkowny minister Sigmar Gabriel (SPD) je Ruskej napřećo wosebje hibićiwy. Hižo třeći raz ju wón po nastupje zastojnstwa před pjeć měsacami wopyta.
Tónkróć přebywa wonkowny minister w južnoruskim Krasnodarje, hdźež wobdźěli so hromadźe ze swojim kolegu w zastojnstwje Sergejom Lawrowom na konferency wo partnerstwje městow. Tam dźe wo to, na komunalnej runinje zesylnić zwiski mjez woběmaj krajomaj, kotrež su ukrainskeje krizy dla chětro poćežene. Dalša tema rozmołwow mjez Lawrowom a Gabrielom je, kak wožiwić wjaznjene prócowanja wo rozrisanje konflikta mjez proruskimi mocami na wuchodźe Ukrainy a jednotkami Kijewskeho knježerstwa. Nic naposledk pojednataj ministraj nowe, wot ameriskeho senata wobzamknjene sankcije na njedobro Ruskeje, přećiwo kotrymž je Sigmar Gabriel raznje protestował, dokelž móhli tež europske předewzaća w kraju čućiwje trjechić.
