To a tamne (22.11.16)
Natutkana, pod wliwom drogow a tež hišće z handyjom w ruce je 54lětna žona z awtom po Kasselu jězdźiła. Policistam wona napadny, dokelž so sama za wodźidłom fotografowaše. Test alkohola wunjese 1,3 promile. W ručnej tobołce namakachu zastojnicy nimo toho hašišowu cigaretu. Jězbnu dowolnosć su šoferce nablaku sćazali.
Dojednanje spěwacych honačow w braniborskim Zitzu dla je kritiku zwjazka plahowarjow rasoweje pjerizny zbudźiło. „Plahowar móže z tym žiwy być, za kokoše je zawěranje w kurjencu hórke, dokelž so tam wodnjo porjadnje do so dadźa“, měni rěčnik zwjazka. Hobyjowy plahowar bě so po lěta trajacej zwadźe ze susodami dojednał. Kokoše a honače smědźa jenož hišće wot 8 do 20 hodź. na zahrodu. Njedźelu a swjate dny wšak dyrbja cyle w kurjencu wostać.
Atentatnik 27 ludźi morił
Kabul (dpa/SN). Při sebjemordarskim nadpadźe na jednu z mošejow afghaniskeje stolicy Kabula je po informacijach policije 27 ludźi žiwjenje přisadźiło. 35 wosobow so zrani. Mjez mortwymi su tež dźěći. Po informacijach nutřkowneho ministerstwa bě so sebjemordarski atentatnik před šiitiskej mošeju rozbuchnył. Radikalno-islamscy talibanojo zamołwitosć za nadpad dotal wotpokazuja.
Železnicar njezbožo zawinił
Traunstein (dpa/SN). W procesu železniskeho njezboža w Bad Aiblingu dla, při kotrymž bě 9. februara dwanaće ludźi zahinyło, posudźowachu fachowcy dźensa podawki, kotrež wjedźechu k zražce dweju ćahow. Wobskorženy je 40lětny železnicar, kiž měješe swój čas słužbu we wuhibkarni. Fachowc zarjada Zwjazka k přepytowanju železniskich njezbožow zwěsći, zo bě železnicar w rozsudnym wokomiku wopak jednał a z wopačnym signalom njezbožo zawinił.
Wo ćěkancach debatowałoj
Dźěłarnje braniborskich jastwow su dźensa w Podstupimje na ...
Sarkozy wčerajasnje podležał
Petry jako direktna kandidatka wuzwolena
Nětko je SPD na rjedźe
Reakcije na připowědźenje Angele Merkel, zo znowa kandiduje
Berlin (dpa/K/SN). Wčerawše připowědźenje předsydki CDU Angele Merkel, klětu nastupić štwórty raz jako kandidatka na kanclerstwo, so powšitkownje wita. Wuskutk tohorunja je, zo je nět SPD na rjedźe. Přechwatać pak socialdemokraća ničo nochcedźa. Na schadźowanju prezidija a předsydstwa strony dźens w Berlinje hišće ničo njerozsudźa, kaž z jeje nawodnych kruhow rěka. Internje ma so za to: Jeli šef SPD Sigmar Gabriel nazymu 2017 njenastupi, by prezident parlamenta Europskeje unije Martin Schulz k tomu zwólniwy był.
Merkel we wusyłanju ARD zwurazni, zo přećiwo populistam njebudźe wojować ze zasadnje změnjenym kursom. Na razny, polarizowacy wólbny bój pak so wona nastaja. Jeje wašnje njeje problemy jenož mjenować, rozrisanja chce wona poskićeć dźiwajo na w zwisku z migraciskej krizu zesylnjenu AfD.
Gabriel plany zadźeržał
To a tamne (21.11.16)
Tež dobre 54 lět po smjerći Marilyn Monroe su wosobinske wěcy něhdyšeje sławneje spěwarki přeco hišće chětro wunošne. Tři dny trajace přesadźowanje w ameriskim Los Angelesu z jeje wosobinskeho zawostajenstwa je jědnaće milionow dolarow wunjesło, kaž awkciski dom Julien‘s Auctions zdźěli. Takrjec jako wjeršk su wčera šat přesadźowali, w kotrymž bě Monroe lěta 1962 prezidentej Johnej F. Kennedyjej k narodninam zanjesła: Tón předachu za 4,8 milionow dolarow.
Z jěduceho awta na puć padnył je pjany muž na awtodróze A 5 pola Freiburga – a je so jeno snadnje na hłowje zranił. Wóz bě z něhdźe 100 km/h po puću, jako na zadnjej ławce sedźacy muž z dotal njeznateje přičiny z njeho padny. Za nim jěduce awta móžachu so runje hišće tak wuwinyć. Šoferka woza bě tohorunja chětro natutkana, kaž rěkaše.
Cyž: Najprjedy hódnotu pruwować
Budyšin (SN/JaW) Domowina njeje w naležnosći ponowjenja sakskeho Serbskeho zakonja hišće žane wunošne naprawy zahajić móhła. To wunjese naprašowanje čłona Zwjazkoweho předsydstwa Domowiny Jana Nuka. Kaž praji Nuk na zašłej zhromadźiznje gremija w Budyšinje, chcył wón zakoń tak změnić, zo konkretnje Domowina zajimy Serbow zastupuje. 1991 njeje so to ze wšelkich přičin poradźiło. „Smy 25 lět dale. Snano móhli to nětko zwoprawdźić“, měnješe Nuk. Zdobom by po jeho měnjenju „cirkus wo zastupnistwje Serbow zakónčeny był“. Tež prawo skorženja za třěšny zwjazk chcył zapisać dać, kaž to w ponowjenym Serbskim zakonju w Braniborskej maja. (Čitajće tež pod Zapósłane na 2. stronje.)
Hišće tójšto prašenjow
Marrakesch (dpa/SN). W marokkoskim Marrakeschu chcychu dźensa wječor po planje prěnju swětowu klimowu konferencu k přesadźenju směrnicow historiskeho Pariskeho klimoweho zrěčenja zakónčić. Tež na poslednim dnju bě hišće tójšto dypkow njerozrisanych, předewšěm prašenje pjenježneje podpěry na dobro tych krajow, kotrež pod změnu klimy najbóle ćerpja. Hač do kónca redakciskeho časa njebě jasne, hač konferencu tola hišće krótkodobnje njepodlěša.
Wuradźuja wo kontrolach
Brüssel (dpa/SN). Nutřkowni ministrojo Europskeje unije su dźensa w Brüsselu prěni króć wo planach wuradźowali, kak móhli so kontrole při zapućowanju do EU znowa rjadować. Wot komisije EU srjedź tydźenja předpołoženy naćisk mjez druhim předwidźi, tež tajkich pućowacych přepruwować, kotřiž po Schengenskich zasadach wizum njetrjebaja. To potrjechi na přikład staćanow USA, Israela a Brazilskeje.
Gauck Nagasaki wopytał
