Knježerstwo nima informacije
Prašenja łužiskeje zapósłanče Zelenych k antiserbskim podawkam
Drježdźany (SN/MkWj). Zapósłanča Zelenych w Sakskim krajnym sejmje Franziska Schubert je so z wjacorymi prašenjemi na krajne knježerstwo wobroćiła, kotrež poćahuja so na antiserbske aktiwity w dwurěčnej Łužicy. Tak chcyše wona wědźeć, kotre dopóznaća ma sakske knježerstwo wo aktiwitach tak mjenowaneho Ariskeho bratrowstwa (Aryan Brotherhood) w Sakskej, předewšěm pak w zwisku z antiserbskimi podawkami. Sakske knježerstwo wobkrući, zo je skupina předewšěm w interneće wo wjacorych zarjadowanjach a swjedźenjach rozprawjała a zo běchu jeje čłonojo tež na namócnosćach mjez wukrajnikami a neonacijemi 9. septembra w Budyšinje wobdźěleni. Wo přećiwo Serbam měrjenych podawkach krajnemu knježerstwo informacije njepředleža, kaž z lista nutřkowneho ministra Markusa Ulbiga (CDU) wuchadźa. Wuraznje wón w tym zwisku na to skedźbnja, zo informacije wo tutej skupinje tež z pomocu wustawoškita tajnje zběraja. Tele informacije njejsu zapósłancam krajneho sejma přistupne.
To a tamne (26.10.16)
Hillary Clinton budźe prezidentka USA. Tak znajmjeńša wěšći to pinguin Flocke w Lubnjowskej Sprjewinej kupjeli. Pinguina, kotryž je dotal skerje na polu kopańcy dobyćerjow wěšćił, běchu so zamołwići dwaj tydźenjej do prezidentskich wólbow USA „woprašeli“. Woni połožichu jemu bulej z mjezwočomaj Hillary Clinton a jeje kontrahenta Donalda Trumpa k hrajkanju. Flocke rozsudźi so bjez wahanja za Clinton-bul.
Na policajskej straži dale kradnył je runje lepjeny paduch w sewjerorynsko-westfalskim Güterslohu. Ze swojim přećelom bě so wón do garaže policista zadobył. Tón jeju lepi, jako sej kapsnej lampje do zaka tyknyštaj. Lědma, zo běchu jeju na policajsku stražu dowjezli, jedyn z njeju w njewobkedźbowanym wokomiku dalšu kapsnu lampu spakosći. Nětko ma so 17lětny dwójneho padustwa dla před sudnistwom zamołwić.
Připóznaće dźiwow přiwótřene
Vatikan (B/SN). W přichodźe budźe ćešo, dźiw wobkrućić dać. Vatikan je proces za připóznaće dźiwow wobdźěłał a je jón zdźěla přiwótřił. Zo njehodźi so wuhojenje wujasnić, dyrbi w přichodźe sydom město dotal pjeć ekspertow zwěsćić, tež jich zarunanje za to ma transparentniše być. A woni njesmědźa kontakt měć ze stajerjemi próstwow na zbóžno- abo swjatoprajenje.
Twar cyrkwje postupuje
Barcelona (B/SN). Hižo 134 lět twarja na wonkownym znamjenju španiskeje metropole Barcelony. W lěće 2026, k 100. posmjertninam prěnjeho architekta Antonija Gaudija, ma cyrkej Sagrada Família hotowa być. Nětko započinaja 140 metrow wysoku wěžu maćerje Božeje twarić. Nastać maja tež štyri wěže ewangelistow a 170 metrow wysoka wěža Chrystusa.
Poćahi k Pólskej zesylnić
Berlin (B/SN). Berlinski arcybiskop Heiner Koch je hódnoćił wujednanje ze susodnym krajom Pólskej po wójnje a wuhnaću. To „je žohnowana stawizna, kotraž ma wjele činić z miłosću a wodaćom“, wujasni Koch w rozhłosu RBB. Zdobom wón namołwi, njepopušćić „w našim prócowanju, dobre poćahi rozkćěć dać, a tak zdobom skrućić w Europje měr a swobodu“.
60 mortwych po nadpadźe IS
Islamabad (dpa/K/SN). W pakistanskim měsće Quetta (prowinca Baluchistan) su třo ekstremisća policajsku šulu nadpadnyli a w njej znajmjeńša 60 wukubłancow zatřělili kaž tež wjac hač 120 z nich zranili. 250 ludźi policija wuswobodźi, při čimž nadpadnikow mori. K atentatej přizna so teroristiska milica Islamski stat (IS). Nutřkowny minister prowincy zdźěli, zo su so skućićeljo do jedneje ze spanskich žurlow zadobyli a na spjacych kadetow třěleć započeli.
Žane spěšne dojednanje
Berlin (dpa/K/SN). Prezident parlamenta EU Martin Schulz z tym njeliči, zo dóńdźe w diskusiji wo wikowanskim zrěčenju Ceta k spěšnemu dojednanju. „Tónle tydźeń drje hišće žane rozrisanje njedocpějemy“, rjekny wón dźensa w sćelaku Deutschlandfunk. Štwórtkowny wjeršk Europskeje unije a Kanady dyrbja tuž přestorčić. Rozsudny zadźěwk je, zo Belgiska Ceta blokuje, dokelž jeje region Waloniska jemu njepřihłosuje.
Na njepomocy wšitcy wina
Policija je dźensa runočasnje w pjeć zwjazkowych krajach racije ...
Swjeća dźeń UNO w sakskej stolicy
To a tamne (25.10.16)
Bjez wulkeho zboža wostachu paduši, kotřiž měrjachu so na nakładne awto. W nocy na njedźelu rozrězachu skućićeljo płachtu pólskeho nakładneho awta, kotrež steješe na awtodróhowym parkowanišću w braniborskim Herzsprungu. Šofer w tym času kruće spaše. Lkw transportowaše 14,5 tonow hodownych štomow. Wo te pak pakostnicy njerodźachu a so zminychu. W Braniborskej paduši stajnje zaso płachty nakładnych awtow rozrězuja.
Při pospyće, łožo přez wokno wottransportować, je so 38lětny w badensko-württembergskim Hayingenje ćežko zranił. 73lětny pomocnik přijědźe z traktorom a suny łopač traktora direktnje pod wokno. 38lětny sadźi łožo na łopač, kotraž pak so njejapcy zwróći. Muž padny štyri metry do hłubiny a so na chribjeće ćežko zrani. Najskerje bě so łožo ručicy dótknyło, na čož so łopač zwróći.
Za kanclerstwo Merkel
Berlin (dpa/K/SN). Z rjadow CSU dóstawa Angela Merkel (CDU) spochi wjace podpěry za to, znowa kandidować na kanclerstwo – njedźiwajcy wadźeńcy politiki napřećo ćěkancam dla. Nětko je so tež předsydka krajneje skupiny CSU w zwjazkowym sejmje Gerda Hasselfeldt za jeje znowanastup wuprajiła. „By-li Angela Merkel zwólniwa była, by wona moju połnu podpěru měła“, Hasselfeldt zwurazni. Oficialnje wšak njeje so CSU hišće pozicioněrowała.
Walloniska so dale spjećuje
Brüssel (dpa/SN). Krótko do dźensa wječor planowaneho rozsuda wo dóńće wikowanskeho zrěčenja mjez Europskej uniju a Kanadu Ceta su signale z belgiskeho regiona Walloniska dale negatiwne. Prezident regionalneho parlamenta André Antoine rjekny rozhłosownikam, zo njemóže ultimatum EU respektować. Prezident Rady EU Donald Tusk bě sej hač do wječora jasnu wotmołwu z Brüssela žadał. Dyrbjała-li Belgiska zrěčenje wotpokazać, dyrbja za štwórtk planowane podpisanje CETA wotprajić.
Dulig znowa wuzwoleny
