Luxemburg (dpa/K/SN). Předołžena Grjekska ma w juliju wot swojich europskich partnerow dalšich 8,5 miliardow eurow pomocnych srědkow dóstać. Na to su so financni ministrojo eurokrajow na swojim zeńdźenju dojednali. Tež Mjezynarodny měnowy fonds (IWF) je po dołhim wahanju swoje wobdźělenje na pomocnym pakeće připrajił, štož bě za Němsku rozsudne wuměnjenje. Grjekske knježerstwo tele pjenjezy nuznje trjeba, zo móhło dypkownje dołh kraja wotpłaćić. Šef euroskupiny Jeroen Dijsselbloem rěči wo „wulkej kročeli“ doprědka. Z reformami, kotrež je grjekske knježerstwo dotal zwopradźiło, su wěrićeljo spokojom.

Budyšin (SN/JaW). Zapósłanc Sakskeho krajneho sejma Marko Šiman (CDU) je składnostnje 25. róčnicy schwalenja wustawy Sakskeje brošurku wudał. W njej dopominaja so bywši a tuchwilni zapósłancy a dalše wuznamne wosobiny na wutworjenje wustawy w swobodnym staće, mjez nimi Benedikt Dyrlich a Stanisław Tilich. Wosebitosć stostronskeje knižki, kotruž je Šiman bjez spěchowanja wudał, je historiska hymna Sakskeje a jeje serbski wotpowědnik, Handrija Zejlerjowy „Wótčinski spěw“.

Skažena ryba, hnijace larwy insektow a smjerdźate hadźace hłowy – wšo to su cłownicy w Mnichowje w póstowej posyłce ze Sambije namakali, kiž měješe priwatna wosoba w Mnichowje jako chłóšćenku dóstać. Larwy insektow pochadźeja wot wačkow, kotrež w južnym dźělu Afriki jako delikatesu jědźa. Na­jebać to cłownicy posyłku sćazachu a zničichu, dokelž to zakoń za škit přećiwo mrětwam předpisuje, cłownistwo zdźěli.

Na wšě 48 hodźin w Pariskich podzemskich katakombach staj młodostnaj wutrać dyrbjałoj, doniž jeju policija njenamaka. 16- a 17lětnaj běštaj dehydrěrowanaj a steještaj pod šokom. Pariske katakomby su 300 kilometrow dołhe. Něhdy jako skały wužiwane chódby su jenož zdźěla přistupne. W přistupnym dźělu składuja nopy a kosćowcy. Zbytny dźěl je za wopytowarjow zakazany. Najebać to so stajnje zaso ludźo do njeho zwaža. Tam pak jara spěšnje orientaciju zhubja.

Berlin (SN). Po kritice ze stron serbskich cyłkow (SN rozprawjachu) na plakat AfD za wólbny bój zwjazkoweho sejma, hdźež je žona w delnjoserbskej drasće widźeć, je strona nětko ze stejišćom na zjawnu diskusiju reagowała. Wona wotpokazuje wumjetowanje syće młodych sorabistow, zo instrumentalizuje narodnu drastu. „Plakat tež pawšalnje přećiwo zapućowarjam njepolemizuje, kaž so twjerdźi“, komentuje zwjazkowa rěčnica AfD Frauke Petry wuprajenje předsydy Domowiny Dawida Statnika we wčerawšim wudaću nowiny SZ. „Cyle hinak, tón skedźbni na to, kak sej swójske tradicije a mnohotnosć w našim kraju wažimy. (...) Chcemy pak na strach pokazać, zo so někajka nabožna kultura pod płašćikom ‚pisanosće‘ rozšěrja, ale pódla sebje žanu ‚pisanu mnohotnosć njeakceptuje‘“, Petry wuwjedźe. Dale w zdźělence rěka, zo je AfD „za přeća runje serbskeje mjeńšiny přeco wotewrjene wucho měła“. Strona skedźbnja na to, zo su­ lěta 2014 samo wólbne plakaty w serbskej rěči měli, dokelž rozumja, „kak ma mjeńšina wojować. Tohodla so za to zasadźamy, zo nadobo sami mjeńšina w swójskim kraju njebudźemy.“