Rom (dpa/SN). Z napjatosću wočakowachu wuslědki wčerawšich komunalnych wólbow w Romje. Kandidatka a kritikarka EU ze strony Movimento 5 Stelle (M5S) Virginia Raggi je prěnja měšćanostka wěčneho města. Raggi, kotraž bě so we wólbnym boju přećiwo wuhotowanju olympiskich hrow w lěće 2024 wuprajiła, je so z něhdźe dwěmaj třećinomaj hłosow přećiwo Robertej Giachettijej přesadźiła. Na dobyćerku wólbow nječakaja runjewon lochke nadawki. Dawno hižo njeda so město korupcije dla prawje wobknježić. Załožer strony M5S Beppe Grillo rěči mjeztym wo historiskim dnju. „Wotnětka so wšitko změni. Nětko smy my na rjedźe.“ Tež w Turinje je dalša kandidatka M5S Chiara Appendino komunalne wólby dobyła.

Razantne wuwiće nowych medijow poćežuje předewšěm mjeńšinowe nowiny, wšako nimaja zwjetša dosć mocow a pjenjez, so na tym polu tak spěšnje znowa orientować kaž „wulke, swětne“ medije. Tež Serbske Nowiny njejsu wuwzaće. Wuslědk zetkanja Zjednoćenstwa dźenikow w mjeńšinowych a regionalnych rěčach (MIDAS) w Bozenje pokazuje, zo su Serbske Nowiny na prawym puću. Smy so znowa wusměrili, a to na regionalnosć a serbskosć, předewšem, štož nastupa politiske rozprawnistwo w našim wječorniku. Generalny sekretar MIDAS Günther Rautz je to wobkrućił: Powěsće ze swěta wšudźe dóstawamy! Serbske lokalne a specifiske pak skerje w SN. To zdobom pokazuje, zo je regionalnosć wulka šansa! Chcemy ju wužić a smy so tuž znowa wusměrili. Tak dopokazujemy, zo na přeća našich čitarjow reagujemy. Tež z nowym internetnym wustupom to činimy. Janek Wowčer

Ćěkancy a europska mysl w srjedźišću zetkanja MIDAS stali

Bozen (SN/JaW). Postup nowych medijow a digitalizacija stej mjeńšinowym dźenikam wulke wužadanje. Tole zwěsćichu wobdźělnicy hłowneje zhromadźi­zny Zjednoćenstwa dźenikow w mjeńšinowych a regionalnych rěčach Europy (MIDAS)­, kotraž wotmě so hač do wčerawšeho w Bozenje.

Z hroženjom, Donalda Trumpa za přichodneho prezidenta USA wolić, je sej prošer w New Yorku tójšto fenkow zasłužił. „Daj mi dolar, abo hłosuju za Trumpa“ steješe na tafličce, kotruž bě muž kónc tydźenja blisko Times Squarea w Manhattanje nastajił. Přeco zaso turisća a pasanća stejo wostawachu a dawachu prošerjej pjenjezy. W interneće poskićeja nětko samo T-shirty­ z hrónčkom muža.

Nižozemska je swětowy mišter, znajmjeńša dołhe nosy nastupajo. Z 65,9 milimetrow dołhim a 52,52 milimetrow šěrokim nosom, to je suma 118,42 mm, je sej Nižozemjan Hans Roest titul wudobył. Kuriozne wubědźowanje přewjeduja kóžde pjeć lět w bayerskim Reichertshofenje, a towarstwo 1. nosowy klub swěta je iniciěruje. Lokalna matadorka Susanne Kloiber je sej mjez žonami ze 103,55 milimetrami titul zawěsćiła.