Berlin (dpa/SN). Připowědźenja europskeje komisije dla, juristisce přećiwo Němskej postupować, přesunje zwjazkowy wobchadny minister Alexander Dobrindt (CSU) zazběh mawty za wosobowe awta. Hišće njerozsudźeneho wukónca skóržby dla nima zmysła, nadawki za wobhospodarjenje mawty wupisać, měni Dobrindt. Wón pak chce přiwšěm zawjedźenje popłatka přihotować.

Rom (dpa/SN). Bamž Franciskus w swojej nowej encyklice njesměrny konsum, zničenje wobswěta a podćisnjenje poli­tiki pod zajimy hospodarstwa šwika. „Hišće nihdy njejsmy ze swojim zhro­mad­nym domom takle špatnje wobchadźeli“, kri­tizuje wón w spisu, kotryž dźensa wo­zjewichu. Při tym měri so tež na politi­karjow. „Njewuspěšne swětowe wjerški ke klimje dopokazuja, kak jara so politika technologiji a financnemu systemej podwola­“, 78lětny piše. Razantne wuwiće w bohatych krajach wuskutkuje so předewšěm na njedobro chudych. Přiběrajcy so swět z wotpadkami zanjerodźa, zemja wuwiwa so na „hoberski črjopjenc“. Raznje zasudźa bamž nadměrne wužiwanje interneta na kóšty socialnych kontaktow jako „duchowne wochudnjenje“.

W kupnicach žiwidłow na wustup hić ma přichodnje w Berlinje móžno być. Senator­ za wuwiće Andreas Geisel (SPD) chcył kupnicy nuzować, wustupy zjawnosći spřistupnić. Rjadowanje płaći spočatnje jeno za nowe kupnicy, poněčim pak chcedźa tež wobstejace zapřijeć. Hłowna přičina je přiběraca ličba starych ludźi w měsće. Za nich nimaja tuchwilu dosć zjawnych nuznikow.

Torty debić je wuměłstwo. To je Lübe­ck­ske hamtske sudnistwo rozsudźiło. 47lětna designerka tortow njetrjeba tuž pokutu čornodźěła dla płaćić, dokelž bě bjez dowolnosće rjemjesło wukonjała. Kaž sudnistwo zwěsći, je zhotowjenje indiwidualnych motiwow za debjenje torty kreatiwny wukon, kotryž normalne dźěło konditora přesahuje. Rjemjeslniska komora bě designerku čornodźěła dla wobskoržiła (hlej wčerawše SN).

Mostowe myto Junckerej

Zhorjelc (dpa/SN/ch). Prezident komisije EU Jean-Claude Juncker dóstanje dźensa wječor Mjezynarodne mostowe myto europskeho města Zhorjelca/Zgorzeleca za lěto 2014. Wone hódnoći zasłužby Junckera wokoło zjednoćenja Europy a jeho žiwjenski skutk. Myto přepodadźa w Pětrowej cyrkwi zapozdźene, dokelž dyrbjachu termin w aprylu krizoweho wjerška k dramje ćěkancow dla přestorčić. Juncker dlěje hač 20 lět žiwjenski rum Europy pod hospodarskimi, ale tež socialnymi a kulturnymi aspektami wuhotuje, wobkrući Mostowa towaršnosć swoju wólbu. Z 2 500 eurami dotěrowane myto spožčeja wot lěta 1993 wosobinam, kotrež maja zasłužby na wujednanju a dorozumjenju w Europje.

Njezbožo přepytować přestali