Amtěrowacy swětowy mišter w mjetanju ručnych tobołkow, 44lětny Andreas Ruland, chce jutře w Bottropje titul za­kitować. Při tym spušća so na swoju mjetansku techniku: wupřestrětu ruku da­le a spěšnišo w kole wjerćeć a tobołku skónčnje pušćić. Swětowe mišterstwa wotměwaja so wo lěta 2012.

Dźiwadłowy kruch je w Allgäuju zasadźenje policija zawinił. Žona bě zastojnikow alarmowała, po tym zo bě w lěsu wutřěle a škrěčenje słyšała. Zastojnicy wšak zwěsćichu, zo słušeše to do dźi­wadłoweho krucha, w kotrymž nadpad a nastatu paniku napodobnjeja. Najebać wopačny alarm policija žonu chwaleše, prajo: Radšo jónu wjace zazwonić hač jónu přemało.

Kabul (dpa/SN). Talibanojo su w zapadoafghaniskej prowincy Herat jědnaće wukrajnych turistow, mjez nimi běchu pječa tež Němcy, wobtřěleli. Při tym so pjeć turistow zrani, zdźěli rěčnik tamnišeho guwernera. Medije běchu samo wo mortwych rozprawjeli. Wojerska eskorta skupinu přewodźeše, kotraž bě po puću do prowincneje stolicy Herat. Tam je tójšto historiskich twarjenjow. Namocy a aten­tatow dla wšak lědma hišće turisća do Afghanistana přińdu.

Wobydlerjo namołwjeni

London (dpa/SN). Reagujo na nadpad z nožom z jednej mortwej a pjeć zranjenymi wyši měšćanosta Londona Sadiq Khan wobydlerjow namołwja, měr wobchować a kedźbliwi być. 19lětny bě so wčera wječor na naměsće Russell Square z nožom do ludźi dał. Při tym žonu mori kaž tež dwě žonje a třoch muži zrani. Policija móžeše skućićela zajeć. Po prěnich dopóznaćach je wón psychisce chory.

Hinz dotal njereagowała

Bywšeho wyšeho měšćanostu Budyšina Christiana Schramma (nalěwo) su wčera ze Zasłužbowym rjadom Swobodneho stata Sakskeje wuznamjenili. Ministerski prezident Stanisław Tilich (CDU) jemu najwyše wuznamjenjenje kraja w Drježdźanach přepoda. Z čestnym rjadom hódnoća wjelelětne zasadźenje Schramma w mnohich zastojnstwach na komunalnym, socialnym, kulturnym a cyrkwinskim polu. 64lětny Schramm bě wot 1990 hač do 2015 Budyski wyši měšćanosta. Foto: Matthias Rietschel

Praha (ČŽ/K). Dokelž so čěski prezident Miloš Zeman boji, zo móhli so Hradčany stać z cilom teroroweho nadpada, chce wón Praski hród „wobtwjerdźić“ dać. Ministerstwo za zakitowanje přewostaji za wotpowědne wěstotne naprawy 100 milionow krónow (něhdźe 3,7 mio. eurow). „Kotre naprawy to su, wězo njepřeradźu“, prezident rozłoži, „njemyslu na to, teroristam dźěło wolóžić.“ Na prašenje, hač maja konkretneje informacije wo wohroženju, Zeman rjekny, zo tomu tak njeje. Wot spočatka lěta na Hradčanach wšelake wobmjezowanja hižo płaća. Tak njeje dźěl južnych zahrodow zjawnosći přistupny – w křidle hrodu nad nimi ma prezident Zeman swoju dźěłarnju. Připrawjene budu specialne kamery, kotrež zamóža potencielnych teroristow sčasom spóznać. Na turistow-wopytowarjow Hradčanow čakaja njepřijomne kontrole. Zachod do katedrale swj. Wita wuhotuja z wěstotnym wobłukom. Štóž chce do sławneho Božeho domu zastupić, dyrbi najprjedy kaž na lětanišću „přepruwowadło“ přeńć.